Banko Sentral a krea impreshon ku Ennia ta den problema serio, miéntras esei no ta bèrdat.

Skalo— Banko Sentral  a mal informá pueblo di Kòrsou i tambe parsialmente korte di hustisia. Esaki ta lokual por konkluí for di e último desaroyonan rondó di e kaso ku na Yanüari próksimo, mester risibi informashon riba balor di Mullet Bay. Ni Ennia su maneho interino i tampoko Banko Sentral ta koperando ku korte pa yega na e balotashon.

Aparte di no ta koperando, Banko Sentral a krea impreshon ku Ennia ta den problema serio, miéntras esei no ta bèrdat. E posishon di likides na Ennia ta unu fuerte i por mantené esaki pa por lo ménos 5 pa 7 aña. Ta asina ku segun e último proposishon di resolushon Ennia, presentá pa ekspertonan den banko i Ennia, e kompania ta pagando anualmente 48 mion florin na prima di penshun na penshonadonan. Pero alabes e kompania ta kobrando kasi 100 mion anual na pólisa serka su klientenan di penshun. Pa lokual ta trata likides, e kompania por lo pronto por sigui paga penshonadonan te na momento solushoná problema di solbabilidat ku tampoko tabata 1.1 miar manera Banko Sentral a menshoná. Banko Sentral huntu ku Ennia Caribe Holding a manda informashon robes i krea pániko innesesario den komunidat.

Mas serio ainda, siman pasa e Unidat Monetario (Banko Sentral) ta emití un komunikado ku diripiente penshonadonan no mester tin prekupashon mas. E anunsio a bini apénas algun siman pa partidonan den debakel presentá un balor di Mullet Bay. E areglo anunsiá ta nada mas sino un atmishon di Banko Sentral, ku e Tribunal di Tres wes den Korte di Apelashon ta bai kalkulá e daño muchu mas abou di 1.1 miar ku Banko Sentral a kalkulá, lagando insinuashonnan di Banko Sentral den Skalo, pa averiguá kua splikashon ta bai duna. Presidente di Korte di Apelashon, Hues mr Geloven a menshoná un suma di 300 mion florin pa partidonan trata na yega na un areglo, lokual ta kuadra ku te ainda a imponé komo multa na 260 mion florin. Banko Sentral, su 1.1 miar florin, ta leu for di realidat i promé ku entrega rapòrt di Mullet Bay, e instituto monetario a emití un komunikado anunsiando un areglo.

E areglo anunsiá pa Banko Sentral ta menshoná periodo di 50 aña komo tèrmino pa e kontinuashon kontrolá. 50 aña ta ridíkulo i largu mirando ku no tin garantia si e Union Monetario lo eksistí entre St. Maarten i Kòrsou, aki 50 aña. Mas aleu, ta menshoná ku durante 50 aña ta solushoná e problema di solbabilidat, miéntras solbabilidat di kompanianan, ta dependé di kon haltu e interes ta desaroyá i Banko Sentral no tin un bola di glas pa mira aki 50 aña. Ademas, ni korte, ni Banko Sentral ni tampoko grupo Ansary no tabata por a duna durante tratamentu, un kalkulo riba e daño di solbabilidat. Te kua durante publikashon di e artíkulo aki, no tin un kalkulo asertá pa niun akountent kiko e ta daño ta ku hasta Korte den Apelashon a ordená pa bai kalkulá e balor di Mullet Bay komo e úniko mangera pa por balotá si en bèrdat por tabatin daño okashoná na solbabilidat di e konsorsio

Sin un kalkulashon ordená pa Korte di Apelashon, ta imposibel yega na un kalkulo di e défisit okashoná pa e sakeonan ku a finalisá na 2018. Te ainda Banko Sentral no ke akordá huntu ku grupo Ansary riba un kompania pa laga balotá Mullet Bay. Banko Sentral ta bin na haltura si balor di Mullet Bay sali riba 300 mion florin, nan teoria di 1.1 miar florin ta fábrika. Pa tal motibu, un anunsio riba areglo di Ennia ta kuestionabel i prematuro, hibando un ofensa riba desishon di Korte di Apelashon.

Te ku 6 siman pasa, CBCS tabata papia di por lo ménos 50% deskuento òf mas riba bolsa di penshun. Ta kuestionabel kon mediante un komunikado di apénas 20 frase ta menshoná ku no tin deskuento mas riba e bolsa di penshun. I hasta krea speransa ku e penshun awor ta garantisá. Un ponensha kompletamente diferente lokual abogadonan ku a kosta mas ku 30 florin a presentá den korte.

Mester apuntá ku Vigilante ta e úniko medio di komunikashon na Kòrsou, ku a sinta e último tratamentu den Korte di Apelashon na Kòrsou durante tur sinku dia di tratamentu. E komunikadonan emití pa Banko Sentral no ta representá lokual a bini dilanti den korte i lokual e tribunal di tres hues a kuestioná tantu grupo Ansary komo Banko Sentral.  Finalmente, un punto di diskushon tambe ta bira ku aparentemente, CBCS ta garantisá e kontraktnan di penshun nobo, lokual ta kontradesí statutonan di Banko Sentral. Apesar ku e fayonan tabata debí na supervishon, Banko Sentral no por duna garantia riba Bolsa di Penshun, debí na riesgonan eksponé den Penshun si akaso, e bolsa pèrdè balor lokual ta imponé Banko Sentral su reservanan na peliger.