DEN HAAG—Kaha di gobiérnu posiblemente lo hiba perdida riba nashonalisashon di ABN Amro, segun minister demishonario Kaag (Finansa).

Ku e kaida di balor di akshon di e banko e pèrdida lo resultá na 6,7 mion euro, segun e minister den un karta na Tweede Kamer. Gobièrnu hulandes a paga 22 miar euro durante e krisis di kredito pa e divishon hulandes di Fortis. E banko a bira ABN Amro riba merkado finansiero den 2015. For di e tempu ei estado ta bende akshonnan okashonalmente. Den último simannan e benta di un pakete nobo di akshonnan a generá 842 mion euro segun Kaag na Tweede Kamer. Luna pasá a bira konosí ku Estado kier baha e interes den e banko bou di 50%. Resientemente estado a partisipá den un programa den kua ABN Amro ta kumpra su mes akshonnan. Esaki a genera 281 mion euro pa kaha di gobièrnu. Ku esaki a gana 9,6 miar euro ku benta di e akshonnan. Inkluyendo pago di dividendo e konteo ta na 15,4 miar euro. Konsiderando ku e balor di bankonan a baha riba merkado finansiero Kaag ta kere ku lo tin pèrdida ku ABN Amro. Pa gana tur e gastunan di kapital bek lo mester bende e partisipashon restante na un preis di 28,74 euro. No ta realistiko ku lo logra un preis asina riba termino korto segun Kaag. Pa konserva e akshonnan di ABN AMro pa algun aña ku speransa ku e preis ta oumentá no ta deseabel segun Kaag. Estado no ta invershonista i no ta invert ku riesgo si esaki no ta sirbi interes públiko. ABN Amro a bai den man di Estado pa garantisá stabilidat di sistema finansiero i no komo invershon pa haña rendimentu.