Bahia Santa Ana—Un bishita ku minister Charles Cooper i direktor di Refineria di Kòrsou, Patrick Newton a hasi pa Venezuela, riba aprobashon di Promé Minister Pik Pisas, a solushoná un problema mionario entre PDVSA i Rdk.

Ta trata di un problema ku tabata den korte di arbitrahe na Suisa, unda tabatin “contra claim” riba otro, for di kual Refineria di Kòrsou ta alegá un debe di PDVSA na 105 mion dòler estado unidense. Cooper ayera no a konfirmá e suma, kual ta “disclosed” i no konfirmá tampoko kontenido di e kombersashon. Pues no por papia ainda riba kuantu sèn a sera un proposishon. Cooper den un reakshon ayera na Vigilante a konfirmá e bishita. Segun Cooper, representando akshonista di RdK e la hasi un bishita ku Patrick Newton pa Venezuela. Propósito di e bishita tabata pa negoshá e disputa entre RdK i PDVSA. Segun Cooper e negosashonnan ta “on going” ainda i tin bon perspektiva pa yega na otro. Cooper alabes a menshoná ku na bienestar di e negosashonnan ku ta kontinuá, na e momentonan aki no ta oportuno pa duna mas informashon. Segun Cooper kos ta pintando bon si pa yega na otro pafó di arbitrahe. “Te aki mi por informá”, e la finalisa bisando.

Chèns ta grandi ku úniko manera pa RdK por sera un akuerdo ku PDVSA pafó di arbitrahe ta posibilidat pa un “swap deal” unda ta interkambia debe pa produktonan petrolero. Pero pa por logra esei mester di un aprobashon di OFAC (Ofisina di Kontrolaria Aktivonan Internashonal Estado Unidense). No ta konosi si Refineria di Kòrsou a logra un aprobashon di OFAC, pero ta un hecho ku e kompania Global Oil Management Group si e apliká pa un lisensia OFAC pa por kuminsá importá krudo for di Venezuela. Pa Global e akuerdo nobo entre PDVSA i RdK ta bira unu interesante.

Manera menshoná, Global Oil tambe a hasi nan petishon pa kuminsá importá krudo for di Venezuela. Na momento, OFAC aprobá e petishon, krudo venezolano, despues di 5 aña ta kuminsá drenta Bahia Santa Ana. Mediante intervenshon di nan sukursal establesé na Kòrsou (CORT) , Global a entrega e petishon ofisial na OFAC (Ofisina di Kontrolaria Aktivonan Internashonal) pa un lisensia.  E petishon ta enserá pa CORT, por risibi pèrmit di OFAC di por kuminsá importá krudo i òf produktonan petrolero for di Venezuela. Global tin un kontrakt di 5 aña firma ku Refineria di Kòrsou (RdK) i Curaçao Refinery Utilities (CRU). E kontrakt ta enserá uzo di fasilidat i servisionan di e dos kompanianan kontra di un pago di por lo ménos di 2 mion florin mensual na RdK i CRU, repartí. Aparte di eksportá asfalt pa Estádos Unídos, e sosio  di Refineria di Kòrsou, Global Oil Management Group di Boca Raton, Estádos Unídos, ta dispuesto na eksportá krudo di Kòrsou pa islanan karibense. Esaki ta lo lokual nan konseheronan petrolero Greta Lichtenbaum i David Ribner, a splika e Ofisina di Kontrolaria Aktivonan Internashonal OFAC). Ta e intenshon pa saka e asfalt òf di Kòrsou, eksportá dirèkt pa Estádos Unídos pero tambe tin opshon pa duna sosten na islanan Karibense den mantenshon di nan kareteranan.