Lo bai trata di adaptá lei i  hasi posibel pa detenidonan risibí bishita sin supervishon di nan ser kerí, pa entre otro kontakto seksual.

WILLEMSTAD – E frakshon di MFK ke adaptá e lei ku ta regla e prinsipionan dje sistema penitensiario na Kòrsou. Manera Vigilante a informá medio aña pasá, un dje artíkulonan ku a hinka den e lei adaptá ta hasi posibel pa detenidonan risibí bishita sin supervishon di nan ser kerí, pa entre otro kontakto seksual.

Entretantu Raad van Advies (RvA) a manda un konseho mas resien, di desèmber aña pasá, i e inisiadónan dje proyekto di lei a adaptá esaki konforme e rekomendashonnan. Tambe a kambia e splikashon tokante e lei, esta e Memorie van Toelichting (MvT). Parlamento a risibí tur adaptashon siman pasá. Den e konsepto di lei adaptá por lesa ku lo laga e kantidat di ora dje bishita den man di direktiva di prizòn, pero ku mester tin un mínimo di 2 ora sigur.

Un aña promé, esta desèmber 2019, RvA a saka su konseho tokante e promé vershon dje inisiativa di lei, ku Vigilante a publiká ampliamente tokante dje. RvA ta keha ku den e promé konsepto no a pone sufisiente atenshon na ehekushon di e areglo proponé tokante bishita sin supervishon, den e sentido ku no a splika entre otro si e instituto penitensiario Sentro di Detenshon i Korekshon Kòrsou (SDKK) tin sufisiente espasio adekuá i personal pa hasi esaki posibel. Pero segun e frakshon di MFK e evaluashon dje ordenansa riba e punto akí no tin nada di aber ku e pregunta si tin sufisiente personal ni espasio adekuá den e instituto.

“Na final di dia, si e proposishon di kambio di lei kombertí den lei aplikabel, e ora ei mester kumpli sin mas ku e disposishonnan nesesario pa e implementashon ku a surgi for di loke a bira un obligashon legal pa gobièrnu kumpli kuné sin mas. No ta rekerí un investigashon promé p’esaki. Di forma superfluo ta señalá ku den e sentido ei, Kòrsou ta kedando inaseptablemente atras pa loke ta trata e avansenan internashonal relashoná ku derecho penitensiario. E derecho akí ya ta eksistí ya pa añanan largu pa detenidonan den vários parti di mundu, inkluyendo Latinoamérika. Den e estado estadounidense di Mississippi e bishitanan sin supervishon ta eksistí for di dékada 50 di e siglo anterior, esta 1950.

RvA a konsehá pa inkluí kriterionan den e Memorie van Toelichting di e artíkulo 33g, insiso 5, den kaso ku e direktor por determiná ku e durashon dje bishita sin supervishon dura mas ku e mínimo di dos ora, pa evitá arbitrariedat. Pero e inisiadónan dje proyekto di lei (MFK) ta konsiderá ku determiná kriterionan pa e bishita por dura mas ku e mínimo di dos ora (ku segun RvA tambe mester ta inkluí den e MvT), lo por ta nesesario for di e punto di bista positivista hurídiko pa kondusí na e eksklushon deseá di arbitrariedat. Pero ku tin motibunan tambe pa kere ku e interpretashon ei di e tumamentu di desishonnan dor di e direktor por kondusí na un forma di keuromania den un tendensia desbordá (eksagerá) ku tambe ta karakterístika di e positivismo hurídiko, pa someté tur komportamentu humano na mandamentunan òf prohibishonnan, ku e fin di yega na un sistema será di aplikashon di lei.

Kontrali na esaki, MFK ta deseá laga e hustifikashon di un bishita sin supervishon mas largu, na prudensia di e direktor. E ratio di e disposishon proponé ta ku e durashon dje bishita den kualke kaso mester ta di porloménos dos ora. A base di esaki, e inisiadónan dje proyekto di lei lo ta sigui e konsehonan di Raad van Advies pa loke ta trata e implementashon dje bishita sin supervishon den prizòn.