E tereno kaminda e kachónan di CARF ta situá ta den un bario bon habitá, pero solamente 1 bisiña tabata tin problema ku e kachónan.

Nieuwe Haven,– Den sala di korte sivil abogado mr Ayubi a hiba defensa pa su kliente ku ta eksperenshando basta molèster di un sanktuario di kachó den su área.

Ta trata di un sanktuario manehá dor di Curaçao Animal Rights Foundation(CARF) kaminda un bisiña di edat grandi tin molèster di dje. Aktualmente e sanktuario tin entre 40 pa 50 kachó, kual segun abogado Ayubi ta kousando basta molèster pa su kliente ku inisial V.

E abogado di e dama ku inisial V. a indiká ku e sanktuario a kousa basta daño na salú i daño na entrada finansiero di su kliente i daño aki no por sosodé mas. E abogado a sigui splika ku atraves di tempu su kliente no por drumi mas debí na e zonido di e kachónan i mirando e edat grandi di V. e dama mester di su sosiegu pa keda salú. Alabes, debí na e kantidat di molèster di e kachónan, V. tin basta problema pa hür algun apartamentu riba su propiedat komo ku e apartamentunan ta pegá ku e sanktuario. Pa sostené e puntonan di bista di V. kende a entamá e kaso kontra di CARF, e dama a entregá diferente grabashon kaminda por nota kon duru e kachónan ta blaf.

Abogado mr Kirpalani, kende a hiba defensa di CARF, mesora a indiká ku e grabashon nan ta grabashon  di un momentu, pues e no ta duna un bista realístiko tokante e aktuashon di e kachónan henter 24 ora repartí den henter siman. Alabes, e pruebanan ku V. a entregá no tin kalkulashon investigando kon duru e kachónan a blaf, pues e abogado a trese basta duda den e pruebanan ku V. a duna hues. Investigashon adishonal di Vigilante a konkluí ku bisiñanan den mesun kaya no tin problema ku e kachónan, pero riba un forma òf otro V. si ta eksperenshá e molèster.

Defensa di V. hibá pa abogado Ayubi a pidi korte pa buta preshon riba CARF pa asina e fundashon manda e kachónan na un otro área mas pronto posibel. Akaso CARF no kumpli, e fundashon lo mester di paga un multa na V. E defensa di CARF hibá pa abogado mr Kirpalani a indiká ku e preshon di V. no ta na su lugá mirando ku ya kaba CARF ta den e proseso pa finalisá konstrukshon riba un otro tereno. “Unabes e konstrukshon kaba, tur kachó lo muda, pero pa e mudansa nos mester di tempu”, e abogado a splika hues den sala di korte.

Sinemabrgo, e abogado di CARF a indiká ku mas tardá pa mei mei di aña tur kachó lo wòrdu mové pa e tereno nobo. Pero mesora V. a indiká ku e no por warda asina largu. E dama a splika hues ku ta for di 2019 e ta wardando, pues e no por warda mashá mas.

Ta asina ku hues a intermediá i a proponé pa ámbos partido bai negoshá pa dies minüt pa wak si nan por negoshá kondishon nan faboral. Na un banda e dama V. i su abogado tabata ke pa CARF muda e kachónan mas lihé posibel, pero na otro banda CARF a pidi hues pa duna nan mas tempu ya nan por muda riba un forma adekuá.

Despues di un periodo kòrtiku di negosashon, ámbos partido a logra di drenta den un akuerdo. Ta asina ku CARF i V. a akordá ku e sanktuario lo no risibí ningun kachó mas te dia nan muda pa e otro tereno. Alabes, CARF lo mester muda tur kachó pa e tereno mas tardá riba 31 di mei próksimo. Akaso CARF no kumpli, e fundashon lo mester paga V. un multa di 110 florin pa kada dia.

NOTA DI REDAKSHON: For di eksperenshanan den pasado, redakshon di Vigilante a opta pa no publiká e bario ni kaya kaminda e diskushon nan a tuma lugá. Ora publiká adrès, hopi hende sa bandoná nan kachónan den e área keriendo ku e organisashon konserní lo tuma e kachónan, pero den realidat tur fundashon pa bienestar di bestia ta yen yen.