KRALENDIJK,—-E temporada di mas dushi pa e islanan di eks Antia, ta e temporada di karnaval. Informashon ku Vigilante Farándula ta disponé di dje, ta indiká ku tur kos ta kla pa apertura di e temporada di karnaval 2023 na Boneiru, tambe.

Despues ku aña pasá esaki a keda organisá ku un públiko limitá, e aña aki ta bai ta otro, ya ku mas hende por ta huntu. E apertura ta bai tuma djabièrnè awor, dia 6 di yanüari 2023, den Club Sosial ántes Klup Vitesse, situá na Kaya Neerlandia.

Aki lo bai tin presentashon di JC & Friends, e agrupashon musikal di momentu, kual ta Payola i tambe lo tin presentashon di rei di tumba 2020.

Remarkabel ta ku lo no bende karchi delantá pa e aktividat aki. Esaki ta nifiká ku mester kumpra karchi riba e dia di e aktividat mes. Porta ta habri for di 8’or di anochi di kual na mes momentu por kumpra karchi tambe.

Ta bai tin un bar i kushina bon surtí, unda ku un i tur por pasa dal algu di kome i tambe algu di bebe. Fundashon KLAVE, kier invitá komunidat di Boneiru pa bin masalmente, pa asina gosa di e tremendo apertura di e temporada 2023 di Boneiru su karnaval, kaminda ku riba e anochi aki, tambe lo saka e lema pa e temporada di karnaval 2023.