ALMERE—Den hospital Flevo na Almere a konstatá un brote di e virus Noro riba departamentu di kardiologia, segun e hospital.

Pa e motibu aki e hospital no ta tuma mas pashènt riba e departamentu. Nan lo mester keda atmiti riba otro departamentunan. Pashentnan ku tin keho di e virus ta haña kuido den kambernan isolá. Tambe lo hasi ekstra limpiesa i pone mas atenshon na laba man. Personal ku tin keho mester keda kas te ora nan no tin kehonan pa 24 ora. Bishitantenan di pashentnan ta keda instruí pa laba man despues di bishita i bandona hospital mésora. E virus di noro ta duna un infekshon na intestino i ta hopi kontagioso. E virùs ta okashoná diarea. Kehonan ta entre otro sakamentu i diarea. Pa un hende saludabel e virus ta ferfelu pero inofensivo. Pero pa pashentnan ku poko resistensia nan por bira malu ku e virus.