Un bùs chikí no por transportá pasahero pafó di su ruta durante e orarionan preskribí den lei, esta entre 6or mainta pa 8or di anochi.

Willemstad – Resientemente, tabatin un kaso den korte i a bin dilanti den medionan di komunikashon ku bùs chikí tambe por transportá turista.

Komo aklarashon, Servisio pa Tráfiko i Transporte (UOVV) ta pone na konosementu di komunidat ku konforme nos lei di ‘Transporte Públiko’ un bùs chikí mester transportá tur pasahero (inkluso turista) kontra pago estriktamente konforme su ruta. E ruta spesífiko ta indiká den su pèrmit.

Un bùs chikí pues ta mará na su ruta i ta riba e ruta (trayekto) aki e por transportá pasahero di un parada di bùs pa otro. Na un parada di bùs ta pèrmití solamente pa baha òf rekohé pasahero. Un bùs chikí no por transportá pasahero pafó di su ruta durante e orarionan preskribí den lei, esta entre 6or mainta pa 8or di anochi. Tampoko un bùs chikí no por funshoná komo taksi. UOVV ta spera ku di e forma aki, e ta trese un poko mas klaridat riba e tópiko aki.