Representantenan di CAE sintá huntu ku esnan di Komishon di bario Wishi/Marchena.

WILLEMSTAD – E proyekto di lei “Landsverordening Luchtkwaliteitseisen” a kousa un kantidat di krítika, un poko mas fuerte di parti di e fundashon Clean Air Everywhere (CAE). E punto prinsipal di nan protesta ta dirigí riba e falta di konsiderashon entre diferente interes i e ousensia di normanan pa limitá keintamentu di mundu. E asuntu akí, ku ta esensial pa salubridat públiko i medio ambiente, ta pone lansa preguntanan tokante e posibilidat i efektividat dje lei proponé. E representantenan di CAE, entre otro Gert Mulder a enfatisá ku mester traha un lei pa pueblo kompleto i no pa refineria so.

CAE a hasi esaki durante e reunion di Komishon Sentral di djaluna último den kua a deliberá tokante e proyekto di lei ku ta kontené kambionan esensial relashoná ku e eksigensianan di kalidat di airu. Durante un asina yamá “technische briefing” (informe tékniko) den sala di Parlamento anteriormente, e miembronan a ekspresá e deseo pa tende diferente organisashon ku tambe a ekspresá nan mes riba e lei menshoná.

I relashoná ku e deseo akí Rennox Calmes di TPK, Fergino Brownbill di MFK, Ana Maria Pauletta di PAR, Giselle Mc William di MAN i Sheldry Osepa di PNP, a pidi pa invitá Fundashon Amigu di Tera, Foundation Clean Air Everywhere, Fundashon Birgen i Rosario i Komishon di bario Wishi/Marchena. Riba petishon dje Parlamentarionan, kada un dje organisashonnan akí, a duna un presentashon di nan reakshon riba e lei. Den e artíkulo akí, Vigilante ta para ketu na loke CAE a trese dilanti.

Un di e puntonan prinsipal di preokupashon ta konserní e pèrmit di molèster “Hindervergunning” antikuá di Refineria Isla, ku ta kasi trinta aña meskos. E pèrmit akí ta pèrmití un emishon ku ta 9 biaha mas altu ku e normanan rekomendá pa e organisashon mundial di salú World Health Organization (WHO) pa paisnan den su totalidat. A hasi un komparashon ku seguridat di tráfiko: sí redusí e velosidat máksimo den besindario di un skol, pa baha e kantidat di viktimanan di tráfiko, esaki no ta konta solamente pa outonan nobo, sino pa tur outo. Di manera similar, mester adaptá e pèrmitnan di molèster eksistente pa kumpli ku e leinan nobo pa mehorá kalidat di airu na Kòrsou.

Un otro punto di preokupashon ta e falta di konsiderashon entre diferente interes, manera entre refineria i turismo, salubridat i e efektonan di término largu riba medio ambiente. A ekspresá preokupashon tokante e konsiderashon ekonómiko ku ta falta entre refineria i sektor turístiko, spesialmente esnan den ambiente direkto dje refineria. Ademas tin preokupashon serio tokante e ousensia di normanan relashoná ku e limitashon di keintamentu di mundu, no opstante promesanan anterior di gobèrnu durante un huisio sumario na yüli 2022. E falta di normanan spesífiko pa limitá keintamentu di mundu ta preokupante, spesialmente mirando e vulnerabilidat di Kòrsou pa konsekuensianan di kambio di klima, manera inundashon di playa i saliña, ku ta pone industria turístiko i e isla mes den peliger. Ku Kòrsou komo e pais ku e di dos emishon mas altu pa kapita den Suramérika, ta esensial pa tuma medidanan adekuá pa redusí e spornan ekológiko.

Den bista dje preokupashonnan akí, fundashon Clean Air Everywhere ta pidi pa adaptá e proyekto di lei i e pèrmitnan di molestèr, kaminda ta konsiderá e diferente interesnan i ta inkluí normanan pa limitá keintamentu di mundu. Ta di vital importansia ku e leinan no solamente ta konsentrá riba interesnan di e refineria, pero riba interesnan di tur hende riba nos isla. Asina CAE ta enfatisá. CAE a anunsiá den Parlamento un biaha mas, ku sí Parlamento aseptá e konsepto aktual, nan lo bai Korte pa  hues destruí e lei, meskos ku a sosodé anteriormente ku e Areglo Ministerial. Esaki ta enfatisá e seriedat dje situashon i e nesesidat di un enfoke komprehensivo di maneho di aire i medio ambiente na Kòrsou.