WILLEMSTAD – Frakshon di Trabou Pa Kòrsou a manda un karta di pregunta pa Minister di Desaroyo Sosial, Trabou i Bienestar (SOAW), relashoná ku e tarea di kòntròl ku Parlamento tin.

Parlamentario Rennox Calmes ke sa sí e Minister por suministrá informashon di kuantu denunsia SOAW tin registrá den e último 3 añanan tokante abusu laboral, akoso seksual na trabou i ta kuantu muhé i hòmber tin registrá. Tambe e ke p’e Minister informá kiko ta e státus dje e kasonan akí; sí a kaba di atendé e kaso òf ainda nò. “Por haña esakinan ekspresá den sifra di e último 3 añanan. Minister por splika e prosedura di SOAW pa atendé e kasonan akí? Unda den lei esaki ta ankrá?” Tambe Calmes ke p’e Minister suministrá informashon di e kasonan ku a risibí abogado pro deo durante e último 3 añanan i kuantu di nan ta pa asuntunan laboral i kuantu nò, kuantu a haña rason i kuantu nò.