WILLEMSTAD –  Minister Pisas enkargá ku Agrikultura, Medio Ambiente i Naturalesa huntu ku kolaboradónan di Ministerio di GMN djasabra despues di a bishitá damnan a hasi un rekorido na diferente playa na banda Bou. Pa Minister Pisas tabata hopi lamentable pa mira playanan ku resientemente a keda drechá, parsialmente destruí atrobe.

Ministerio di GMN ku tin maneho di nos playanan públiko ta rekomendá pa por lo pronto no hasi uzo di algun playa na Banda Bou. Minister Pisas lo hasi tur loke ta na su alkanse pa bolbe drecha e playanan mas rápido posibel pa nos hendenan i turista ku ta bishitá nos isla.

Primeramente Minister Pisas a pasa tuma nota di e kaminda na Sta. Martha ku ta kondusí pa ántes Coral Cliff. Aki por a mira e destrukshon ku awaseru a okashoná riba e kaminda kual porsierto Ministerio di VVRP ya tabata drechando pa hasi e kaminda aksesibel atrobe. Despues a bishitá playa di Sta. Cruz ku a keda parsialmente destruí pa gran kantidat di awa prosedente di dam Kabayé ku a pasa via e laguna bai laman. Aki por mira ku un parti di e kaminda di asfalt tambe a keda destruí. Despues a sigui pa playa Lagun kaminda tambe por a tuma nota di e destrukshon ku awa ku ta bai laman a okashoná. Finalmente a bai playa Kenepa Grandi kaminda por a nota destrukshon similar na e otro playanan di gran kantidat di awa ku a pasa bai laman.

Ministerio di GMN a notifiká CTB ku ta konsehá pa por lo pronto no hasi uzo di e playanan menshoná te un próksimo aviso. Ku hasi uzo di e playanan ta hasi esaki riba propio riesgo. Apesar ku resientemente a drecha e playanan, Minister Pisas lo hasi tur loke ta na su alkanse pa pone e playanan aki na òrdu bèk. Playa Kenepa Grandi, ku porsierto resientemente a gana premio internashonal, semper ta den spòt di websitenan i revistanan internashonal di turismo i relashoná ku esaki mester hasi lo máksimo pa drecha esaki bèk.