Kòrsou mester deshasí di Cft. E kolegio di supervishon, tabata un bon idea pero despues di 14 aña, laga nos ta honesto. E situashon finansiero no a kambia muchu kos, miéntras e modelo di impuesto komo punto di salida dje kolegio ta kolektando mas sèn, pero e kota di invershon publiko no a oumentá. Mas serio ainda, merkado di konsumo na Kòrsou a floha di tal forma ku no ta responsabel mas pa sigui saka awa fo’i mesun èmber pa limpia kas.

Miéntras Cft ta pèrs konsumidó pa paga mas impuesto, ta drenta mas sèn den kaha pa gobièrnu gasta. Riba esaki e kolegio no tin niun klase di kòntròl. Ta nèchi sinta skucha un presidente di Cft, ulandes oropeo splika Kòrsou kiko pa hasi, pero e Cft no ta yudando nos ku e orígen dje problema. Korupshon na Kòrsou a bira un epidemia. Si no atendé kuné e ta mata nos ekonomia. Un bakteria ku ta sirkulá i pega rondó di Gobièrnunan, Hefenan di Servisio, Direktor di Kompanianan Anónimo, Sekretarionan di Estado i finalmente Direktivanan di Fundashon Supsidiá pa entradanan di impuesto.

Cft por bisa nan “kiko pa hasi”  pero e kolegio no tin niun klase di kòntròl “kon nan ta hasié”. I ta einan orígen di e problema ta. Mas sèn drenta kaha mas sèn ta wòrdu korumpí, asina simpel. Anto no tin NIUN kolegio kontroladó riba esaki. Kòrsou ta kobrando alrededor di 1.5 bion florin na e entrada anual. Esei ta nifiká ku kada habitante na Kòrsou ta kontribuí na alrededor di 800 florin mensual na finansiamentu di gastunan operashonal i struktural di e pais. En realidat i den práktika esei no ta bèrdat, pasobra por lo ménos 25% òf mas di nos entradanan ta wòrdu hòrtá pa nos propio representantenan kende ta fòrsando e medidanan riba nos, via di Cft. Un situashon di “shantahe ekonómiko”. Ku otro palabra, paga pa nos sigui hòrta sino mas medida ta sigui bini.

Pa tal motibu e sistema di supervishon finansiero ta kumbiní tur hende envolví ménos e pueblo. Ulanda tin kòntròl riba e polítikonan via di e Lei Finansiero, miéntras e polítikonan ta sostené Cft pasobra mas sèn den kaha pa hòrta, mas posibilidat pa korupshon. Ta esaki ta pasando na Kòrsou aktualmente.

Ta un simpel sírkulo visioso, kual a inisiá na 2010 i awor ta bèk na 2024 pa un Kòrsou na 4.2 miar di debe. Segun Hulanda i Cft, Kòrsou por i mag sigui fia mas sèn. Esei te negoshi pa Cft, kontrolá i Pakete di Pais ehekutá.