Punda- Durante reunion den Komishon Sentral di Parlamento, konsehero i negoshado di gobièrnu John De Lannoy, a splika e kambionan den COHO den kuadro di ehekushon di e lei. Den esaki tambe a establesé ku COHO lo no dura pa semper. Esaki lo ser evaluá despues di 3 aña i lo terminá despues di 6 aña.

De Lannoy a menshoná ku tin algun problema ora a trata COHO. Algun di nan ku tabata importante ta entre otro e ròl di Parlamento, e outoridat di Minister pa Asuntunan Interior i e miembronan di COHO apuntá dor di Hulanda. Segun De Lannoy, Hunta di Estado a duna nan opinion ku COHO no tabata duna e responsabilidat pa e reformanan na e paisnan, sino e tabata tuma esaki pa su mes. Tur esakinan ta tacha e outonomia di e islanan, De Lannoy a splika ayera den Komishon Sentral.

Segun negosiashonnan a sigui, a kambia e nòmber di COHO hasié COHO 2.0 pa asina distinguí loke ku tabata tin riba papel. E kambionan prinsipal ta e ròl di Parlamento kaminda diferente kos a kambia ya asina COHO no por tuma akshon òf desishon riba su mes. Tur proyekto lo tin su plan di akshon i esaki mester keda reflehá den un presupuesto. Esaki ta nifiká ku e proyekto mester yega Parlamento eventualmente pa wòrdu aprobá. Tambe tin e posibilidat ku Parlamento por yama COHO pa asina duna kuenta i rason. De Lannoy ta bisa ku e lei aki no ta infinito. Despues di 3 aña lo evaluá esaki i despues di 6 aña e lei ta finalisá. Si ke prolongá e lei aki lo ta un desishon di Parlamento.

Mas aleu De Lannoy ta bisa ku e outoridat di e Minister di Asuntunan Interno (BZK) pa duna instrukshon tambe a wòrdu limitá. Kòrsou mes lo ta responsabel pa su plannan di akshon, pero lo mester di un aprobashon di COHO komo ku finansiamentu ta bini via COHO. E islanan a haña mas responsabilidat pa ehekutá i lo ta responsabel pa ehekutá nan reformanan. E agènda di ehekushon lo wòrdu establesé huntu ku Hulanda. E agènda aki lo wòrdu establesé kada kuartal.

En prinsipio Hulanda por a apuntá e tres miembronan den COHO, pero awor a yega na un kompromiso kaminda tur 4 pais lo establesé un “profielbeschrijving” di e tres miembronan i a base di esaki ta bai usa un kompania pa buska kandidatonan. Di e kandidato nan aki 2 lo wòrdu skohe dor di e islanan, inkluso e presidente. Hulanda ta skohe 1 miembro for di e kandidatonan.