Selebrashon na Hendirksplein relashoná ku 10-10-10.

Willemstad——Minister Cooper ta menshoná ku un pais outónomo ta unu den kual e pais ta pone su mes normanan estatal i ta ehekutá su mes maneho den diferente áreanan di gobernashon sin influensha òf preshonnan eksterno.

Segun Minister Cooper, lástimamente, den nos kaso ainda nos no ta kompletamente outónomo ounke nos yama un pais outónomo den reino. Minister Cooper ta menshoná ku na 10-10-10 a kuminsá e pais outónomo ku 5 lei di konsenso den reino.

Pero e 5 leinan aki segun Minister Cooper, te awe, ta krea sierto limitashonnan ku ta pone ku e pais no ta realmente i kompletamente outónomo. E leinan aki ta dirigí riba sierto áreanan importantísimo di nos gobernashon interno manera por ehèmpel hustisia (korte, ministerio públiko, polis, supervishon riba leinan hudisial), i tambe supervishon finansiero.  Minister Cooper a menshoná ku a evitá e di 6 lei ku yama CROHO. Segun Minister Cooper tin mas ehèmpel den kual komo pais ta tuma responsabilidat pa atendé ku asuntunan interno manera por ehèmpel den e kaso di Ennia.

Minister Cooper a sigui kompartí por medio di un karta di parti di Promé Minister Gilmar Pisas. Den e karta aki dirigí na pueblo di Kòrsou i su koleganan, Promé Minister Pisas ta kuminsá na menshoná ku e ta sumamente orguyoso di su koleganan. Promé Minister Pisas ta gradisí kada un di su koleganan pa e kurashi, energia, tempu, sabiduria, kontribushon, i e amor inmenso ku su koleganan tin pa sirbi pais Kòrsou. E karta di Promé Minister Pisas ta kontinuá i bisa ku kada stap ku e i su koleganan ta dal, i kada reto ku surpasá, ta pa bienestar di pueblo di Kòrsou i den bienestar di pueblo di Kòrsou.

Minister Pisas ta kontinuá den su karta bisando ku e ke pa generashon nan den futuro tin e muchu mas fásil kompará ku su gabinete aktual. Ku esaki Promé Minister Pisas kemen ku e ke pa e siguiente generashonnan por eksperiensha i goberná pais Kòrsou ku un finansa públiko sano, i un pais desaroyá i outónomo den tur sentido di palabra. Promé Minister Pisas ta bisa ku e ke pa Kòrsou ta un pais outónomo “den kual nos mes ta bas den nos mes kas”.