Willemstad- Resientemente Cpost International N.V. (Cpost) a risibí su sertifikado nivel ORO pa su Seguridat Postal dor di Union Postal Universal (UPU.)  E sertifikado ta keda duná na entidatnan postal ku ta kumpli ku un sèt di standarte di seguridat, ku por keda midí, den e sektor postal.  

Den region di Karibe, na e momentunan aki ta solamente 2 pais, Cayman Islands (plata) i Jamaica (oro), tin sertifikado bálido pa nan Seguridat Postal. Gerensia di Cpost den persona di Sr. Jervhes Josephia, CEO di Cpost i Sra. Niviëla Sambo, Direktor Operashonal di Cpost, a risibí e sertifikado nivel oro di Seguridat Postal for di man di Direktor General di Union Postal Universal, Sr. Masahiko Metoki.   

Un di e ophetivonan di Seguridat Postal ta pa alsa e seguridat di tur operashon den e sektor postal. UPU huntu ku otro partnernan di interes, a definí un sèt mínimo di aspektonan di seguridat, ku por keda apliká den tur fasetanan di e sektor. 

Desaroyando standartenan di seguridat di e sektor postal ku por keda midí, ta kontribuí e.o. na protekshon di e personal, propiedatnan i tambe protekshon di artíkulonan postal en general. 

Cpost a kuminsá ku e trayekto di sertifikashon pa Seguridat Postal aña pasá, ku e ophetivo prinsipal no pa solamente yega na e nivel mínimo ku ta wòrdu rekerí pa kumplimentu mandatorio di e aspektonan di seguridat, pero pa midi tambe e seguridat general di e ret internashonal postal. 

Después di un periodo di preparashon dor di un tim di Cpost, na mart último, Cpost tabata asina leu pa su prosesonan relevante tokante Seguridat Postal na su filial di Groot Kwartier wòrdu revisá, dor di un tim di Union Postal Universal (UPU). Un tim di UPU a bin Kòrsou personalmente pa kontrolá prosesonan di seguridat i operashon postal di Cpost. 

Sr. Jervhes Josephia a indiká ku “Cpost siendo un pòstkantor, ta di gran benefisio pa ta sertifiká, ya ku seguridat di e sektor postal ta un piesa importante di e kadena logístiko ku ta sostené komersio i komunikashon mundial. Kompanianan por tin e konfiansa ku hasiendo negoshi ku Cpost aspektonan di seguridat ta sertifiká pa e organisashon postal mundial i komo tal ta di un nivel haltu”.  

Sra. Niviëla Sambo, Direktor Operashonal a mustra riba e hecho ku “trabou duru ta paga, sin mas. Kòrsou por ta orguyoso di por tin un pòstkantor ku ta sertifiká pa su Seguridat Postal i sigur na nivel oro, entre tantu pais grandi ku no a sa di logra pa risibí sertifikashon pa nan Seguridat Postal”.

Cpost ta yama danki na su tim di personal ku a sa di karga e Proyekto aki ku e resultado máksimo.  Riba foto por mira na momentu ku Sr. Jervhes Josephia, CEO di Cpost i Sra. Niviëla Sambo, Direktor Operashonal di Cpost, ta risibí e sertifikado nivel oro di Seguridat Postal for di man di Direktor General di Union Postal Universal, Sr. Masahiko Metoki