Azul Airlines.

Hato– Curaçao Airport Partners N.V. (CAP), mediante un komunikado ta informá ku e perspektiva di tráfiko di pasahero pa siman di wenter 2023/2024 ta positivo. CAP a bai pa sigurá i retené ruta pa kresementu di tráfiko di pasahero i diversifikashon di kapasidat.

E organisashon ta konsentrá riba merkado for di Estadonan Uni i Sur Amérika. Amstèrdam ta kuenta pa 38% di kapasidat di asiento; Nort Amérika 17%; Sur Amérika 32% i Karibe Hulandes pa 13%. Kresementu total di kapasidat di asiento ta 21% kompará ku 2022. Segun CAP, momento kompará e kapasidat di asiento pa region pa siman di wenter 2023/24 ku siman di wenter 2022/23, Oropa lo krese ku +45%; Sur Amérika ku +32%, USA 21% i Kánada ku +39%. For di Amstèrdam, Corendon lo lansa buelonan nobo nònstòp ku un avion A350, TUI lo krese pa dos biaha diariamente ku servisio dirèkt i nònstòp miéntras KLM lo krese for di tur dia pa diesun (11) buelo den siman durante wenter.

For di Merka, American Airlines ta krese tambe ku mas servisio nònstòp di Charlotte pa tur dia, JetBlue lo krese for di sinku (5x) biaha pa tur dia for di New York, JFK i Delta Air Lines lo lansa servisio nònstòp semanal for di Atlanta, Georgia. Westjet lo krese pa dos biaha (2x) buelo semanal for di Toronto, Kánada. For di Sur Amérika, Azul Airlines lo krese dos biaha pa siman ku servisio nònstòp for di Belo Horizonte, i Avianca lo krese servisionan nònstòp ku diesun (11x) buelo for di Bogota, Kolòmbia.