WILLEMSTAD—— E dia grandi a yega! E avion di Azul Airlines ku diseño di nos Handelskade a baha na Kòrsou, introdusiendo di e manera aki e konekshon direkto entre Belo Horizonte, Brazil i Kòrsou. Azul Airlines ta e aerolínea di mas grandi di Brazil den kantidat di ruta i destinashon ku e aerolínea ta sirbi.

E buelo semanal pa Kòrsou lo keda efektuá ku un avion Airbus A320 ku un kapasidat di 174 stul. E buelo ta sali for di BH Airport na e siudat Belo Horizonte riba tur djasabra pa 1or di mèrdia yegando Kòrsou pa 6or di atardi. E buelo di regreso ta sali Kòrsou riba djadumingu 8:30 mainta i yega Belo Horizonte 4or di atardi. Na yegada di e promé buelo e avion a keda risibí ku e tradishonal saludo di awa. Durante selebrashon di e buelo inougural sr. Vitor Silva, General Manager of Network and Strategic Planning di Azul Airlines a duna e bon notisia ku na luna di òktober i novèmber lo introdusí buelonan adishonal na e skema aktual i entrante desèmber 2023 lo dòbel e frekuensia aktual na 2 biaha pa siman. E notisia a keda hopi bon risibí pa tur dignatario i invitado presente. E buelonan di Azul Airlines ta bini komo resultado di un demanda kresiente for di e merkado di Brazil.

E konekshon nobo di Azul Airlines lo habri posibilidat pa mas turista bin eksperensiá tur loke Kòrsou tin di ofresé; un portafolio amplio di akomodashon, variedat di atrakshon turístiko, playanan bunita, nos historia riku, diferente tipo di evento, deportenan akuátiko, nos kushina krioyo, platonan internashonal i mas ku tur kos nos hendenan amabel. Introdukshon di e buelo direkto entre Brazil i Kòrsou ta brinda tambe mas opshon di biahe pa nos pueblo lokal. Durante e selebrashon a hiba palabra, Minister di Desaroyo Ekonómiko, sr. Ruisandro Cijntje, Minister di Tráfiko, Transporte i Planifikashon Urbano, sr. Charles Cooper, sr. Vitor Silva, General Manager of Network and Strategic Planning di Azul Airlines i sr. Jonny Andersen, CEO di CAP. Ademas, Minister Cijntje, Minister Cooper i Minister Martina huntu ku sr. Hugo Clarinda, direktor athunto di CTB i sr. Jonny Andersen (CAP) a hasi entrega di un plakat konmemorativo na sr. Silva ku un bunita potrèt di nos Handelskade riba dje.  Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP) i Curaçao Airport Holding (CAH) ta felisitá Azul Airlines ku nan destinashon nobo, Kòrsou!