Pa 108 aña e habitantenan tabata wak huma ta sali for di isla.

Punda,– Gabriël Murray di GMN a indiká den sala di parlamento ku e habitantenan di Wishi/Marchena porfin ta bai risibí e derechi di tin kalidat di airu na un nivel adekuá. Segun Murray, esaki ta despues ku 108 aña.

Ayera parlamento a sigui ku e reunion nan tokante e lei pa drecha e kalidat di airu. Manera ya ta konosí riba 19 jüli 2022 Korte di Promé Instansia a dikta ku e areglo ministerial di 2020 den kual gobièrnu a stipulá norma pa kalidat di airu no ta sufisiente pa protehá e komunidat. Korte a dikta ku mester tene kuenta ku e normanan ku WHO ta konsehá i tambe ku e normanan mester ta stipulá den un lei i no den un dekreto ministerial.

E lei ta inkluí entre otro introdukshon di norma general pa kalidat di airu na Kòrsou. Tambe e normanan pa kalidat di airu ta bai forma parti di e investigashon ku ta wòrdu hasí ora ku ta otorgá pèrmit di molèster (hindervergunning).

Na momentu ku e reunion a keda reanudá, mesora Gabriël Murray a splika ku habitantenan di Wishi/ Marchena tin 108 aña ta biba den e huma di refineria. Sinembargo Murray a splika ku despues di 108 aña e habitantenan ta risibí protekshon di airu limpi pa kuida nan salú abase di lei. “Un derechi ku no a wòrdu honrá na e pueblo di Kòrsou ku a bin biba den bisindario di refineria riba 1914, pa por gana nan pan di kada dia.” Mas aleu Murray a splika ku e pueblo a pasa den hopi huma i holó stinki.

Den komparashon ku Hulanda, Hulanda a implementá leinan di kalidat di airu den 22 aña. E trayekto a dura for di 1970 i a kana te ku 1992 pa yega na e norma abou, segun e splikashon di Murray.

Durante un enkuentro informativo ku GMN a organisá den e bario di Wishi/ Marchena, habitantenan di e bario a a risibí oportunidat pa risibí kontesta riba nan prekupashon enkuanto e lei. E nekuentro ku tabata riba 5 di aprel Vigilante a drenta den kontakto ku un habitante kende a splika ku su persona i henter su famia ta sufri di malesanan di pulmon debí di a biba tantu aña bou di e huma di isla. E habitante a splika ku henter su famia ku a krese den Wishi/Marchena tin malesa di pulmon i ku e mes ta sufri di malesa di COPD. E malesa di Chronic obstructive pulmonary disease òf COPD ta un malesa ku ta afektá kon un ser humano su pulmon ta prosesá oksígeno. Tambe e habitante ta agregá ku e tin famianan ku tambe ta sufri di efektonan di e malesa di pulmon i ku algun di su famianan a yega di fayesé di kanser na pulmon.                              

Sinembargo e habitante a splika ku e malesa a kambia su bida por kompleto. E habitante tabata tin un historia ta práktika deportenan di pelea, pero debí na e malesa e no habitante no por a práktika esaki mas.