Investigá: RST for di salida a listra i investigá paden i pafó den garashi di defuntu Florentina.

Punda— Manera publiká serinan di artíkulonan anterior, Helmin Wiels a kuminsá papia na inisio di 2013 ku hefe di RST i inteligensia hulandes, Eric K.. Esaki ta informashon ku fiskal di Ministerio Públiko Gert Rip a konfirmá den korte públikamente.

E promé kombersashon a tuma lugá den e stashon di radio ku Pueblo Soberano tabata uza riba Caracasbaaiweg. Aparte di Rip, tin diferente hende a konfirmá e kòmbersashonnan entre Wiels i Eric K. Un prosès ferbal traha riba deklarashon di un famia di Wiels tambe a konfirmá e kòmbersashonnan.

E kòmbersashonnan entre inteligensia hulandes i defuntu Helmin Wiels a keda skondí pa hopi aña, despues di su morto. Ministerio Públiko, riba preshon di abogadonan, a bin atmití despues. Pero e kòmbersashonnan, nan kontenido a keda sekreto, pero a bira un informashon importante kual a kondusí na morto di Helmin Wiels. Diferente persona a konfirmá ku Wiels tabata bai den oranan di mainta Caracasbaai, su so pa papia ku spion(nan) di Hulanda. Kade Wilsoe, un eks bodyguard di Wiels, un funshonario polisial  i tambe dos ruman di Wiels a konfirmá e kòmbersashonnan. E kòmbersashonnan entre Wiels i Eric K, kende tabata teamchef (hefe) na RST a tuma lugá algun luna despues di e atrako grandi riba bara di oro den haf di Kòrsou(kaso Summer Bliss) pero tambe despues di e atrakonan di oloshi Rolex na Aruba i na Kòrsou . Tantu Wiels komo K., a tene e kòmbersashonnan sekreto pasobra no tabata kumbiní Wiels pa su siguidónan sa ku e tabata trahando un dil ku un ulandes, miéntras Eric K. tabata “as” riba un posishon den  Ministerio di Hustisia na Kòrsou, despues ku e baha na yüni 2013. Pues tantu Wiels komo K., tabatin benefisio na tene e kosnan sekreto. Pero ku Eric K, den Ministerio di Hustisia na Kòrsou, Hulanda tabatin mas akseso na informashon. Wiels a risibi diferente atvertensha pa stòp di papia ku RST i duna informashon. E la neglishá tur. Inkluso unu di su defuntu ruman Werner Wiels. Werner den un deklarashon na Vigilante, riba lugá di stashoná outo na Centrum Piskadera: “mi a bisa Helmin pa stòp di papia ku e hulandesnan, e no kier a tende”.

Kade Wilsoe: “ ma taha Helmin di papia ku RST. Komo eks minister di hustisia, mi tabata sa kon na ta traha”.  Kade Wilsoe tabata eks minister di hustisia pa Pueblo Soberano durante e kabinete di Schotte. Despues di e problemanan entre Pueblo Soberano i MFK na terser kuartal di 2012, Helmin Wiels a kuminsá deshasí di e idea pa mantené e kartera di hustisia, lagando Kade Wilsoe for di e siguiente kabinete di profeshon. Den un desishon sorpresivo, durante negosashon entre Pueblo Soberano, PAIS, Glenn Sulvaran (individual) i Nashonal, Ivar Asjes ta laga e kartera di hustisia kai pa duna PAIS e posishon. Riba 31 di desèmber 2012, Navarro ta huramentá komo minister di hustisia. Te awe, Pueblo Soberano ni Wiels nunka no a duna un motibu públiko dikon a laga e kartera di hustisia kai, pero despues ta bin sali na kla ku un investigashon kontra di Jorge Jamaloodin tabata probabel. Esaki lo a pone hopi preshon polítiko riba Pueblo Soberano i manda mas ola i krítika fo’i skina di MFK. Wiels kier a keda leu fo’i dje polémika ei i laga PAIS i Navarro atendé kuné. Despues ku Wiels a fayesé, Eric K. a keda apuntá komo konsehero den Ministerio di Hustisia. Segun Nelson Navarro, “ami no sa di unda ni kon bini Eric K. por a bira mi konsehero”.  Segun Navarro e la bin hañ’é ku e hulandes riba dje sin nunka a sa ta ken realmente a pon’é komo su konsehero. Si Navarro no tabata sa, ken si tabata sa anto?

Segun Kade Wilsoe, Eric K. tabata bai serka Helmin Wiels pa haña un posishon komo konsehero di minister di hustisia. Wilsoe: “ora mi puntra Helmin dikon e ta papiando ku e funshonario di RST el a benta mi leu i bisami ai, ta un posishon e hòmber ta buskando ora e baha”. E deklarashon aki di Wilsoe por ta kuadra pasobra en bèrdat despues ku Navarro a prolongá su posishon komo minister di hustisia den kabinete Asjes riba 7 di yüni 2013, Eric K. algun siman despues a bira unu di su konseheronan. E anochi riba 5 di mei 2013, durante un rueda di prensa na Fòrti pa informá riba e asesinato di Wiels, Eric K. tabata sintá na mesa huntu ku miembronan di kabinete Hodge. Algun siman despues, K.  tabata bin trabou den un BMW blanku i reuní ku Navarro. Kon por ta posibel ku K.  tabata konsehero di Navarro sin nunka Navarro mes tabata sa ta ken a pon.e einan. Ken a traha e dil pa Eric K. ? Defuntu Wiels entretantu tabata derá den santana na Wishi i no por a duna splikashon. Ministerio Públiko tampoko no ke duna niun deklarashon ta ken a regla pa Eric K. bira konsehero di Navarro. Fiskal Gert Rip ta duna e promé apertura riba pregunta aki. Riba 6 di yüni 2019, 6 aña despues di e kòmbersashonnan, Gert Rip ta atmití finalmente , ku Eric K. a papia ku Helmin Wiels. Esaki el a bin hasi durante tratamentu di Maximus, kontra di Jorge Jamaloodin. Gert Rip den korte: “su nòmber no ta Wim K., sino Eric K. Rip a menshoná esei, pasobra den korte abogadonan tabatin e nòmber robes, pero tabata un “zet” pa Ministerio Públiko aklará e bèrdat despues di 6 aña.

Rip, fiskal di Ministerio Públiko e hòmber prinsipal ku Hulanda a pone pa solushoná morto di Wiels, tabata sa bon bon for di inisio, ku RST i Inteligensia Hulandes a faya di protehá nan informante, Helmin Wiels. P’esei, Hulanda a trata i logra tene kontenido di e kòmbersashonnan un sekreto, te awe 11 ana despues di e morto di Wiels.

Eric K. en bèrdat a papia ku Wiels pero nan no a papia nada riba kriminalnan”. Esei Gert Rip a bisa den korte na 2019. Kemen, si Wiels i K. no a papia riba kriminal, riba kiko nan a papia anto? Kiko tabata e motibu dikon Helmin Wiels a tuma riesgo i papia ku un ulandes miembro di RST i inteligensha hulandes, miéntras e tabata indoktrinando Kòrsou pa no konfia RST, pasobra nan tur ta spion ulandes. Dikon Helmin a despist’a tur su konseheronan i tòg sinta mas ku dos okashon na mesa ku Eric K? Kua dil Wiels a traha ku K.?

Awor ku Ministerio Públiko nunka a dibulgá kiko e dos hòmbernan a papia, ta fásil konkluí ku esnan den robo di e oloshi na Aruba i na Kòrsou, tabata esnan kende a asesiná Helmin Wiels. Den ámbos robo, Ministerio Públiko a sospecha ku defuntu Pretu Florentina tabata envolví.