Ora dama a bai pasa su tas den e mashin di skèn a mira e pakinan di droga den su tas.

Nieuwe Haven,– Hues Mr Snitker a splika den korte ayera ku na momentu ku un akusado hañá su dagfar, i e no presentá den sala di korte pa tratamentu den su kaso, ta trata su kaso sin su presensia.

Esaki ta lokual a sosodé tambe ayera den e kaso di e dama A.T, kende ta keda akusá ku dia 7 di mart el a eksportá 1565 gram di kokaina pa Hulanda.

E dama tabata bayendo Hulanda kaminda e ta bisa, ku Tui pero e tabatin su tas i un maleta. Na momentu ku a pasa su tas di man den e mashin di skèn, a mira dos pakete i despues a bai kontrolá su maleta, kaminda tambe a haña tres pakete mas. E dama a akseptá ku e kier a transportá e droga pa Hulanda i pues e ta total responsabel pa su akto. Fiskal a bisa tambe ku e akusado no ta presente den sala i ku e ta haña esaki ta di lamentá, paso e no por puntra e akusado ta dikon el a hasi esaki. Fiskal a pidi 24 luna di kual 12 kondishonal ku un tempu di prueba di tres aña. Tambe Fiskal a bisa ku e dama no por a sali for di Kòrsou, paso OM tin su pasport konfiská.

Hues Mr. Snitker a bai di akuerdo ku e demanda di fiskal, pues 24 luna di kual 12 kondishonal ku un tempu di prueba di 3 aña.