Ayera a trasladá e dama Lake di prizòn pa Klínika Kapriles pa e haña mas atenshon profeshonal.

Willemstad—- E dama ku djasabra último a logra di hui for di e sentro di detenshon di hende muhé na SDKK despues di a keda evaluá a wòrdu trasladá pa un sentro sikiátriko.

 Tabata djasabra siman pasa ku  personal  di vigilansha di e instituto SDKK e parti di sekshon detenshon di hende muhé  a bin tuma nota ku un detenido di e sekso femenino den e kaso aki Nicole Lake mester a mira e oportunidat pa bandoná e instituto. A bin resultá ku e dama aki mester a subi riba un dak pa asina por a yega na e muraya i a bula ofer di esaki resultá den kura di SDKK.  Seguidamente e dama a kore den kura yega te na e waya i a bula ofer di esaki resultá pafó unda tabatin un vehíkulo para ta ward’é.  E waya ku tin rondó di e kura di SDKK ta dòrná ku e waya di seguridat ku tin blet na dje. Esaki ta pone ku sigur e dama detenido aki mester a herida su kurpa. No a  dura masha ku djadumingu dia 30 di òktober último e tim di aresto huntu ku e personal di DGC a bai den aria di San Pedro unda a bin topa ku e dama Nicole lake ku a hui for di SDKK. E tabata den kompania di un hòmber kual tambe a keda detené .  A bai warda ku ámbos unda a interogá nan pa despues a hiba Nicole e sentro di detenshon pa hende muhé bek. For di e dia ei e komportashon di e dama detenido a kambia drástikamente i tabata kousando basta molèster i forma peliger pa e mes i tambe e otro detenidonan den e sentro. Esaki a pone ku a hiba e detenido e sentro médiko den SDKK kual despues di un opservashon a yega na e desishon ku e dama Nicole mester wòrdu interná den un sentro sikiátriko pa asina por haña asistensia profeshonal. Ayera a hiba e dama pa Klínika Kapriles pa haña asistensia médiko.