Yega: momento e vehíkulo a yega CMC.

Otrobanda— Un dama komersiante huntu ku su esposo i mama di dos yu, djabièrnè último a risibi un herida di bala despues di un intento di atrako. Ta trata di un intento di atrako riba un pareha komersiante propietario di un restorant.

Riba djabièrnè mes a transportá e dama pa Colombia pa e por risibi miho tratamentu médiko i ta rekuperando. Esei ta lokual famianan a konfirmá na Vigilante. Segun informe di polis, tabata  djabièrnè 4 di ougùstùs 2023 alrededor di 01.26’or, Sentral di Polis a risibí informashon di un siudadano ku a indiká ku su partner a risibí un tiru for di arma di kandela den Groot Kwartier i ku e tabata na kaminda pa C.M.C. kuné.

For di investigashon ku polis a realisá a sali na kla mas despues, ku algun hòmber lo a bai na un snèk riba Comanchestraat, na unda nan a hòrta vehíkulo di e propietario ku tabata pará einan i bai kuné. Despues e sospechosonan a trata na atraká un pareha ku tabata moviendo den nan outo den besindario, pero no a logra ya ku e último aki a logra di despistá e atrakadónan. Seguidamente e pareha a persiguí e atrakadónan i den Groot Kwartier e tiponan aki a lòs tirunan dirigí riba e vehíkulo di e pareha, ku e konsekuensia ku un tiru a alkansá e dama okupante. Durante ku e atrakadónan tabata ser persiguí dor di e pareha, nan a bin aksidentá ku e vehíkulo hortá den un labadó riba Kaya Wladimir “Coco” Balentien, di manera ku nan no por a kontinuá ku nan huída.

Na e sitio den Groot Kwartier polis a konfiská e outo ku e atrakadónan a hòrta i mas despues tambe esun di e pareha ku a risibí vários perforashon. Na C.M.C. e dama víktima ku entre tantu a yega ku su partner, a risibí asistensia médiko avansá. E dama, mama di dos yu ta rekuperando i ta foi peliger di bida.