Willemstad –  Minister Pisas enkargá ku Agrikultura, Medio Ambiente i Naturalesa huntu ku kolaboradónan di Ministerio di GMN djasabra a bishitá diferente areá di Banda Bou ku a keda afektá pa e inmenso yobida di djabièrnè den oranan tempran di mainta.

Lokual por a konkluí mediante filmashon di ariba ku drone ta ku e damnan ku nos antepasadonan a konstruí i ku ta keda mantené pa Ministerio di GMN a hasi nan trabou. E ekseso di awa riba kaminda i na vários sitio tabata a konsekuensha di e asina yamá “flash flood”, kual ta momentu ku awaseru kai di forma eksesivo durante un korto tempu riba un superfisie relativamente seku.

Por a tuma nota riba retnan sosial ku tabata bisa ku dam lo a kibra na vários sitio. Despues di inspekshon di Ministerio di GMN huntu ku Minister Pisas por konfirmá ku esaki no ta e kaso. Damnan ta funshoná di tal manera ku momentu ku un dam yena, e awa ta sali via un sakadó bai un dam mas abou òf bai laman. Pero, durante un yobida eksesivo e dam por yena den korto tempu i saka e awa rápidamente via e sakadó di tal manera ku por krea e impreshon ku e dam a kibra sin ku esaki ta e kaso. Mester tene kuenta tambe ku e echo, ku momentu ku awa kai di forma eksesivo riba un superfisie seku, e awa ta desplasá su mes práktikamente mes rápido ku riba betòn òf asfalt te na momentu ku e superfisie kuminsá absorbé e awa.

Meskos ta konta pa e área di Hòfi Mango. Hòfi Mango histórikamente ta riba e ruta ku awa ta pasa momentu ku dam Kabayé yena i saka e awa via e sakadó. Despues di pasa Hòfi Mango e awa ta bai e laguna tras di playa Sta. Cruz i momentu ku esaki yena e ta sigui bai laman. Durante un awaseru nòrmal, dam Kabayé no ta yena fasilmente i si e yena mes, ta un koriente chikitu di awa ta pasa door di Hòfi Mango. Pero momentu di awaseru eksesivo, e awa ta uza e máksimo espasio durante su ruta pa laman. Banda di esaki a bini hopi mas awa aserka for di e serunan rondó di Hòfi Mango i esaki a forma e koriente di awa grandi ku a pasa door di e hòfi.

Riba potrèt 1 i 2 por mira dam Kabayé nèt p’ariba di Hòfi Mango. Por mira e sakadó i ruta di e awa despues ku e dam yena i por mira tambe e dijknan intakto na ámbos banda di e sakadó. E dijk na man robes ta reforsá ku vegetashon. Riba potrèt 3 por mira ruta di e awa na man drechi i robes atraves di Hòfi Mango direkshon pa e laguna di Sta. Cruz i riba potrèt 4 por mira e laguna di Sta. Cruz.

Manera ta kustumber, Ministerio di GMN e dianan aki tambe lo sigui inspekshoná estado di nos damnan pa asina garantisá ku despues di e yobida eksesivo ku a tuma lugá, esakinan keda funshoná di forma optimal.  Riba potrèt 5 por mira Minister Pisas huntu ku kolaboradónan di Ministerio di GMN ta inspekshoná dam Kabayé hasiendo uzo di drone.