WILLEMSTAD,—-Durante di e dianan ku ta tras di lomba, ta masha hopi ta e informashonnan ku kana yega serka di Vigilante Farándula, kual nan a bai rondó di diferente posibel moveshonnan ku ta na kaminda pa bai tuma lugá.

Un di e informashonnan ku Vigilante Farándula, a keda poné na altura di dje, ta bisa ku e chèns ta hopi grandi, ku e kantante kompositor Danny Yanga posiblemente, lo por bai forma parti di e agrupashon musikal nobo, fundá pa e Boneriano Xemio Jacobs komo kantante.

Manera ku e informashon a bira konosí serka Vigilante Farándula, mesora a drenta den kontakto ku e kantante Danny Yanga i manera ku Danny a kontestá su telefon e la haña di tende di e informashon risibí. Ta asina ku e kantante Danny Yanga a duna di konosé lo siguiente:

“Tur ora mi ta puntra mi mes ta kon e informashonnan ta kana yega serka bo, paso práktikamente nada no ta pasa, ku bo no ta keda poné na altura di dje. Laga mi bisa bo asina aki, bèrdat tin kontaktonan hasí, pero pa ku esaki mi no por duna bo muchu informashon, paso ainda tin kòmbersashonnan tumando lugá. Loke si mi por bisa bo ta, ku lo no bai dura mashá ku Xemio mes lo informá tur loke ku ta pasando den su agrupashon musikal nobo”.