WILLEMSTAD,—-No ta bai dura mashá ku farándula lokal ta bai sera konosí ku un agrupashon musikal nobo ku ta bai hiba di nòmber “Cura’Son”.

Ta trata aki di e agrupashon musikal ku a keda fundá pa e legendario kantante kompositor areglista e alabes músiko boneriano ku ta Xemio “Mr. Magic” Jacobs. Mas aleu Vigilante Farándula a haña informashon ku e front di “Cura’Son” ta formá pa tres kantante.

E tres kantantenan ta Danny Yanga, Roëlla “Lady Elgo” Jacobs Goilo i Xemio Jacobs. Pero mester bisa ku Xemio su nòmber artístiko a kambia i bira “Xem Brysan”, i Roëlla a bira “Lady Elgo”. E tres kantantenan sigur, no ta deskonosí den mundu di farándula i tur tres ya den pasado e yega di traha ku otro.

Pa loke ta trata agrupashon musikal “Cura’Son” ya nan a pone dos piesa nobo riba merkado i ámbos di e piesanan ta kantá pa e kantante “Xem Brysan”. For di seno di e  formashon musikal menshoná Vigilante Farándula a keda poné na altura ku e di tres piesa ku ta bai subi merkado di agrupashon musikal “Cura’Son” lo bai ta den dos di e kantante Danny Yanga i ku esaki lo bai ta un komposishon i areglo di “Xem Brysan. E di kuater piesa ku lo bai kaya, lo bai ta den bos di e kantante “Lady Elgo” i esei tambe lo bai ta un komposishon i areglo di “Xem Brysan”.