Disparsé den laria: avion di dos motor Baron 58. Beechcraft ku e number YS751T, tabata stashoná na Kòrsou. E la disparsé for di radar.

Hato—E organisashon anti-narkotráfiko estado unidense ubiká tambe na Kòrsou, DEA ta riba un investigashon di intentonan pa saka avionetanan for di Kòrsou. 12 di Mei último, un piloto ku dokumentashon falsifiká a keda arestá, despues ku DEA tabatin bista riba e avion. Djadumingu último, deskonosínan a bolbe saka un avion riba plataforma di Hato. Atrobe tin un investigashonnan andando.

Pa lokual ta trata e insidente ku a tuma lugá djadumingu último, outoridat di aviashon na Kòrsou ta den full investigashon kiko por a sosodé. Un avion ku, tabatin basta dia stashoná na Kòrsou a sali pa Bucaramanga, pero a disparsé despues di a keda sin tuma kontakto ku toren di kòntròl na Aeropuerto Internashonal di Maiquetia.  Ta por lo ménos pa di tres biaha e aktonan similar ta tumando lugá na Hato i DEA tin atenshon pa e kasonan.

Djaweps 11 di mei 2023 último, alrededor di 01.00’or di mèrdia, personal di Imigrashon na Jet Center di aeropuerto Hato, a konstatá un piloto ku un lisensia falsu. Esaki tabata den kuadro di un kontròl rigoroso ku Imigrashon, personal di polis i di duana na Hato den koperashon ku otro, a realisá tantu riba e piloto komo e avion. Mas leu no a haña nada pa konfiská pero sí a optené informashon balioso pa ku e investigashon. Na e sítio polis a detené e hòmber sospechoso K.A., nasé na Mexico di 31 aña di edat, en konekshon ku falsifikashon di dokumento. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.

Entretantu a laga K.A. den libertat. A bin resultá ku e la drenta Kòrsou riba un buelo komersial i tabatin tur dokumentashon bon reglá pa saka un avioneta for di Kòrsou. No ta konosí si ta trata di mesun avioneta ku a logra sali riba 25 di Yüni último. Pero ta un hecho ku DEA a hasi sondeo na CCAA, outoridat di aviashon i tráfiko na Kòrsou. Djadumingu último, un situashon similar a sosodé.

E avioneta stashoná na Kòrsou a sali pero a pèrdè. Ta trata di un avioneta ku tabata stashoná riba plataforma na Hato Kòrsou ku a sali 25 di Yüni destinashon Bucamaranga Colombia. E la bin pèrdè kontakto ku e toren di kontròl na Lara.  Vise minister di protekshon sivil i rísiko di estado Lara a informá e insidente ku un  avion a sali Kòrsou ku destinashon Bucamaranga a bin pèrdè kontakto ku e toren di kontròl ubika na aeropuerto internashonal di Maiquetia Venezuela miéntras ku e tabata bula den e espasio aéreo di estado Lara.  Ta trata di un avion di dos motor Baron 58. Beechcraft ku e number YS751T. Ta trata di number di Salvador. E último kontakto ku tabatin ku e avion tabata via radar na mas òf ménos 21.7 mia di Barquisimeto.

E avion ku e number menshoná pa outoridat venezolano ta mesun avion ku tabata stashoná na Kòrsou. Outoridat na CCAA ta tratando na pone un konekshon di tabata mesun intento riba 11 Mei pa saka un avioneta unda a arestá un piloto klandestino di nashonal mehikano.