Momento di e Destaho Publiko

Fortuna—E struktura di Campo Alegre, ta unu di e strukturanan korporativo mas komplika, ku kisas korte sivil i penal mester trata, for di 2008 te na momento a bende e lokalidat ayera riba findishi na Gobiernu mes.

E kaso di Campo Alegre  ta trata di un veredikto di korte unda unu dje kompanianan (ko) propietario di Campo Alegre, Wilshire Advisors a keda konden’a pa paga sumanana mionariospa labamentu di plaka. E sen nunka a bini den kaha di Gobiernu i awor Gobiernu mes a opta pa kumpre.

 Wilshire Advisors Ltd. a keda kondená den korte pa paga 14.219.548 florin i Campo Alegre CV i 11.040.806 florin, pues un total di 25 mion florin. E siguiente aña despues dje sentensia a asesiná un dje doñonan Giovanni van Ierland. E tabata forma parti di Wilshire Advisors.Den e kaso ei tabatin mas kompania embolbí, esta Krisia NV, Curaned Vastgoed NV i Talisa NV. Nan tambe a keda kondená den Korte di Promé Instansha riba 22 di yüni 2007. Tantu Krisia komo Talisa a keda kondená pa paga 2.250.000 florin nan kada unu, pero Korte Superior a destruí e sentensianan ei. E kompanianan aki tabata sosio general di Campo Alegre CV. i un simpel kapa pa e vehíkulo di labamentu di plaka mes, esta Wilshire Advisors.

E kaso di Campo a sigui kologá den laira pa hopi tempu.  Campo Alegre tabatin miónes na debe i medidanan di Corona a pone ku esaki tambe a kousa debenan astronómiko. Minister Públiko kier a bende e lugá na vindishi pero esaki a keda posponé na diferente okashona. E sèn ku e vindishi generá lo mester bai den e fondo di krímen. Ayera Prome Minister Pik Pisas a konfirma ku Gobiernu di Korsou a kumpra Campo pa 8 mion florin. Ministerio Públiko ku ta ehekutá sentensianan, ta esun ku den e kaso aki a duna kantor di notario Simon & Steenbaar órden pa bende resort kaminda tabata pèrmití prostitushon. Den e kaso aki Ministerio Públiko ta ehekutando e sentensia di ekspropiashon di Korte Superior di 20 di novèmber 2008. E doñonan di Campo Alegre, esta Wilshire Advisors Ltd. establesé na Tortola, British Virgin Islands i e eksplotadó Campo Alegre CV, a keda ekspropiá di mas di 25 mion florin, ku mester bai Estado di Antia Hulandes, manera e sentensia ta indiká.