DEN HAAG—E debe total di estudio di eks-studiantenan i studiantenan aktual a alkansá 28,2 miar euro den 2023.

Ta trata di 1,6 mion studiante segun Ofisina Sentral di Estadistika (CBS). E debe ta subi tur aña i a dòbel for di introdukshon di e sistema di fiansa den 2015. Entrante e aña eskolar nobo gabinte a stòp e sistema di fiansa i a reintrodusí e beka básiko pa studiantenan den enseñansa avansá. Despues di oumento di kantidat di hendenan ku un debe di estudio esaki a keda igual for di 2021. E kantidat di hende ku debe mas di 30.000 euro a oumentá. Entretantu esaki ta 330.000, ku ta 26.000 mas ku 2022 i 215.000 mas ku den 2015. Alrededor di 120.000 hende tabatin un debe di estudio di mas ku 50.000 euro i 1800 di nan un debe di mas ku 100.000 euro. pa mitar di studiantenan e debe ta bou di 10.000 euro. E kategoria di edat ku mas debe ta entre 25-30 aña, ku ta pagando bek. E debe ta promedio 22.900 euro. Ayera a bira konosí ku e interes riba debe di estudio lo oumentá kasi 5 biaha mas di 0,46 pa 2,56%, e interes di mas haltu den 14 aña. E oumento ta resultado di e oumento di interes ku gobiernu mes mester paga pa duna fiansa.