Pronóstiko di International Energy Agency te ku 2050.

Willemstad,– Pronóstiko di “International Energy Agency(IEA)” a konkluí ku e region Karibe kombiná ku e region Latino Amérika ta bai eksperenshá un oumento den uso i produkshon di energia pa 2050.

E region Latino Amérika kombiná ku Karibe ta keda un region kaminda por ferwagt un oumento den suministrio di energia i alabes demanda di energia. E oumento den suministro i demanda ta debí na kresementu di poblashon kombiná ku kresementu di e diferente region nan ekonómiko ku ta keda repartí den Latino Amérika i Karibe. Esaki IEA a indiká den nan pronóstiko di energia 2023.

Segun e predishon pa futuro di ‘Sustainabel Energy Pathways(STEPS)’, pa futuro por spera ku e suministro di energia por eksperenshá un kresementu di 10% entre 2022 pa 203. I sinembargo pa 2050 por bai eksperenshá un oumento den 35% pa 2050.

For di e mesun análisis ekspertonan di IEA a indiká ku e demanda di koriente ta bai oumentá dos biaha mas rápido ku kombustibel di fuentenan fòsil. Aktualmente e konsumo final di energia den e region Latino Amerika i Karibe ta primeramente for di fuentenan fòsil/petrolero, pero pa e parti di petroleo por nota ku esaki no ta kresiendo tan rápido mas. Esaki ta debí ku paisnan ta buskando otro alternativa di energia pa entre otro transportashon.

Meskos ku otro paisnan na mundu e diskushon di energia kombiná ku transishon di energia tambe a yega Kòrsou. Kaminda na mei 2023 Kòrsou i Hulanda a uni forsa pa produkshon di energia sostenibel, na fin di aña aki Kòrsou, representá dor di promé minister Pik Pisas a bishitá Dubai relashoná ku konferensha di klima, COP28.

Aktualmente ministerio di desaroyo ekonómiko tin un grupo di trabou pa traha riba e transishon di energia pa pais Kòrsou. E grupo di trabou ta keda enkargá ku investigashon tokante energia solar, energia di bientu, almasenamentu di energia i produkshon di hidrógeno bèrdè. Alabes e grupo di trabou ta bai analisá e posibilidat di eksportá e energia pa otro paisnan den eksterior kaminda riba su turno lo generá entrada bèk pa Kòrsou.