Jorge Jamaloodin.

Koraal Specht—Profesor mr. Stijn Franken, e pila prinsipal pa Jorge Jamaloodin a bini Kòrsou pa papia ku su kliente Jorge Jamaloodin. Huntu kuné ta programa tambe Peppie Sulvaran pa bai direkshon Koraal Specht.

Bishita di Franken pa Koraal Specht ta lanta spekulashon di e proseso di Jamaloodin ta den revishon, mirando ku ya kaba Korte di Kasashon no a onra na petishon pa evaluá e veredikto final den apelashon. E dos abogadonan, durante último tratamentu a insistí riba duda den testigunan ku Ministerio Públiko i Prokurador General a uza kontra di nan kliente Jamaloodin.  Segun e abogadonan def ensor di Jorge Jamaloodin den kaso Maximus, Ministerio Publiko a sali fo’i punto di bista ku su kliente a aserka un otro persona pa asesiná Wiels. Den e sentido aki, Fonseca lo tabata un figura intermediario i asina Fonseca a duna Pretu Florentina e órden. Segun e abogadonan, den morto di Wiels tabatin un finansiadó i a kondena nan kliente. Esaki ta un punto di salida robes ku no por karga verifisidat.

E evaluashonnan di Ministerio Públiko tambe a bisa ku  Fonseca a keda den sombra i aserka Pretu Florentina pa ehekutá e asesinato. Di e manera aki segun Ministerio Públiko, Jamaloodin lo a tene su mes riba un distansha for di e grupito ku a asesiná Wiels. Pero esaki lo a nifiká ku Kuwas i kompania no por tabata sa ken tabata esnan kende a duna tarea i pone e sèn na disposishon. Kuwas, a bisa bon kla ku e sa ku únikamente Fonseca a duna e órden di asesinato. Kuwas na ningun momento no a menshoná Jamaloodin. Ademas segun Franken i Sulvaran, Bolle Martinez i Elvis  Kuwas nan deklarashonnan no ta kuadra, lokual ta trese duda si en bèrdat nan tabata sa tambe ta ken a paga òf aló ménos si tabatin un órden a bini for di fuentenan mas haltu. Franken a bisa ku no por kore riesgo den un kaso grandi asina aki. Na desèmber 2020, B5 su deklarashon ta un desaster riba konsistensha. B5 no ke bisa ta ken ta e hendenan ku a dun’é  sierto informashon.  Por ehèmpel el a menshoná e Robo na Summerbliss unda a bai ku 200 kilo di oro balorá na11 mion dòler

Franken, kende awe ta bek na Kòrsou a bisa den korte ku Ministerio Públiko a skohe un pasio i laga tur demas indikadónan bai. E abogado profesor a trese e puntonan aki dilanti pa mustra kon testigunan anónimo a deklará detayenan falsu. Einan tin duda riba e.o. testigu B5, pasobra B5 ta konfirmá ku por ehèmpel ku Martinez tabata su fuente miéntras Martinez no tabata na altura di e detayenan di e asesinato i pagamentu pa mata Wiels.