DEN HAAG—Un kantidat konsiderabel di politikonan hulandes ta haña seguridat segun investigashon di e programa Zembla.

Zembla a indika ku informashon personal di 27 parlamentario den Tweede Kamer ta seyá pa risikonan di seguridat. Banda di esaki 21 presidente di frakshon ta haña pakete di seguridat. E pakete di seguridat ta konsistí di por ehèmpel alarma spesial na kas, intercom, porta spesial, segun Eerdmans di JA21. Segun e programa 25% di parlamentarionan ta haña seguridat. E kantidat aki ta hopi haltu. Si konta tambe periodistanan, abogadonan, huesnan i fiskalnan, esaki ta nifiká ku nos demokrasia ta bou di preshon, segun minister di Hustisia Dilan Yesilgöz a bisa den Zembla. Ministerio Públiko i kordinadó nashonal anti-terorismo NCTV ta konfirmá na Zembla ku nan a duna tarea na Kadaster pa seya informashon di parlamentarionan pa motibunan di seguridat. Diferente politiko inkluso Sigrid Kaag (D66) a bisa ku ta bandoná politika pa motibu di menasanan. Den 2022 a drenta 1125 melding di menasa i instigashon kontra parlamentarionan i mandatarionan. Esaki ta kasi dòbel kantidat ku den 2021. Kasi 50% di e 1125 denunsianan a bini di Geert Wilders (PVV). Hopi menasa tabata bin di paisnan pafó di Union Oropeo, prinsipalmente Pakistan. Wilders tabata den korte e siman aki pa un kaso di menasa di un pakistaní. E pakistaí Khalid Latif a hasi yamada pa asesiná Geert Wilders. Wilders a hasi uso di su derecho pa papia.