No por djis sera stranheronan den baraknan na SDKK. Aktualmente mester dokumentá tur kos.

Nieuwe Haven,– For di un veredikto di korte ku a ser publiká riba djabièrnè último, por nota ku mester evaluá i duna motivashon amplio por eskrito, promé ku manda un persona indokumentá sinta su proseso di deportashon den barakanan na SDKK.

Ta asina ku e hòmber Venezolano N.N.V.Z no mester sinta ningun detenshon den e baraknan di ilegal pendiente su deportashon. E punto di bista dikon, a ser spliká amplio den e veredikto di korte ku a keda públika siman pasá. Tambe por nota ku no por “djis” sera un persona indokumentá den baraknan pediente nan deportashon ta simplemente kontra di lei.

E veredikto di korte sivil a resumí entre otro ku promé ku detené un ekstranhero, mester skucha e stranhero promé. Promé ku e detenshon mester pidi e stranhero informashon relevante tokante su situashon personal kual por influenshá e desishon pa detenshon den barak. Mester ta na altura entre otro tokante uso di remedi, malesanan ku e indokumentado por tin i si tin demas famia na Kòrsou. Sinemargo, mester evaluá e informashon risibí ku por determiná si e stranhero por risibí medidanan ménos pisá pendiente e deportashon pa e pais original.

Tur e informashon risibí, mester wòrdu butá por eskrito, kaminda por usa un formulario standard pa asina fasilitá e proseso di dokumentashon. Segun e veredikto, e dokumentashon ta importante pa asina aklará ki pregunta i ki kontesta e persona indokumentá a duna i risibí.

Den e desishon di detenshon no mester tin motivashon pa spesifiká kua motibu ta eksistí pa detenshon, sino tambe pakiko no por tin un desishon mas leve pendiente e deportashon. E motivashon aki mester ta relashoná ku e stranhero ku a drenta Kòrsou riba forma ilegal. Ta posibel ku den e motivashon por usa forumaliaronan standarisá kual por yuda ku situashon nan ku sa bini ariba ku regularidat, entre otro na momentu ku hopi indokumentado yega Kòrsou riba lancha pareu.

Akaso e stranhero entregá un petishon di ausilio, e ministerio mester evaluá e petishon di deportashon. E ministerio mester evaluá petishon di ousilio mas lihé posibel i preferibel mesora ku e stranhero entregá su petishon. Mas aleu, e ministerio mester evaluá si e situashon personal di e indokumentado a kambia atraves di tempu.

Por último ministerio di hustisia tin e obligashon pa re-evaluá e situashon di e indokumentado será kada 6 luna di nobo.