Maria Garcia ta menshoná ku e kampaña aki ta trata di kambio di mentalidat
pa ku bienestar di animal na Kòrsou.

Willemstad, — Dierenbescherming tabata tei presente dia 4 i 5 di òktober na Sambil pa asina informá i rekoudá fondo pa asina por realisá kampaña di konsientisashon i edukashon.

Maria Garcia di Dierenbescherming ta menshoná ku ta eksistí ya pa mas ku 60 aña kaba i ku den tur e añanan aki, a haña e eksperiensha i konosementu nesesario pa asina por bini ku solushonnan efektivo. A trata di traha ku diferente otro grupo ku ta bogá den interes di animal, pero no ta tur bia kolaborashonnan tabata mesun efektivo. E vishon di Dierenbescherming ta solushonnan ku ta den interes di animal, pero tambe di pueblo di Kòrsou kompletu. Esakinan ta enserá sterilisashon, asil, edukashon, konsientisashon, i tambe vigilansia di leinan di protekshon di animal.

Maria Garcia ta menshoná ku sigur tin mas grupo ku ta bogá den interes di bienestar di animal, pero tambe ta importante pa tin un vishon ku ta hopi mas amplio i unu ku ta efektivo. Por ehèmpel, tin hendenan di ménos rekurso ku no por paga gastunan di nan animalnan, pero ku si ke hasi algu pa ku nan bestianan. Maria a menshoná ku den pasado a bini ku un plataforma di bestia den kual no tabatin solushon masha efektivo. Mester di un vishon konhunto di e problemanan presente den komunidat di Kòrsou, pa asina por atendé ku e asuntu di animal na Kòrsou mas mió.

Maria Garcia ta menshoná ku tin leinan for di aña 1952 den kual ya kaba ta prohibí pa laga kachónan kana riba kaya. Pero falta di vigilansia a pone tambe ku e asuntu di animal lòs riba kaya ta manera e ta awor aki. Ta pa esaki promé ku yega na e parti di vigilansia mas estrikto ta bai lansa un kampaña den kual ta bai reeduká i konsientisá pueblo. Na e momentunan aki Maria Garcia ta menshoná ku ta traha kaba riba konsientisashon di muchanan na skol básiko di grupo 1 te ku 8 tokante bienestar di animal. Ta siña e muchanan por ehèmpel kon ta kuida por ehèmpel pushi i kiko pushi lòs riba kaya ta nifiká pa bienestar di medio ambiente.

Den luna di òktober ta bai rekoudá fondo pa asina por realisá e kampana pa konsientisá i eduká pueblo. Maria Garcia ta menshoná ku no ta konvensé pueblo pa kumpra un produkto òf servisio pero ta pidi pa aportá pa asina por realisá e kampaña aki.  Pa realisá e kampana lo hasi benta di buki, T-shirt i tambe lo hasi kolekta na diferente buzon riba diferente establesementu. Por haña e buzonan na entre otro botikanan i supermerkadonan. Riba djasabra lo tin diferente boluntario ku lo yuda pa asina rekoudá e fondonan por medio di kolekta.