Mireya Blavia

Nieuwe Haven—Korte Sivil na Kòrsou ta bolbe risibi atenshon internashonal, na momento dos viuda di e magnate Osvaldo Cisneros ta bai bataya den korte pa un herensha mionario.

Cisneros, kende a fayesé na Òktober 2021 ku Covid, a bai laga un herensha atras inkluso kolekshonnan di arte. E dos viudanan ku e la laga atras inkluso nan yunan ta rumbo Nieuwe Haven pa solushoná e disputa familiar.

Prensa internashonal ta siguiendo e bataya for di 2022 na momento e famianan a kuminsá bringa pa e herensha. Na Kòrsou, United Trust Company, manehá pa Gregroy Elias tambe mester presentá den korte pa alegashonnan ku Mireya Dafine Blavia Cisneros tin kontra di su eks rival Maria Ella Fontanals Cisneros. Ta trata di dos muhé ku kende e magnate venezolano i gigante di media, Osvaldo Cisneros tabata kasá ku nan.

E dos muhénan i nan yunan a kuminsá bringa otro den korte i awor e kaso ta yega Kòrsou. Ta konosí ku e promé viuda, Maria Ella Fontanals Cisneros ta un kolekshonado di arte rekonosé mundialmente i atraves di aña tin un kolekshon mionario di esaki. Fontanals a sigui uza e fam Cisneros anke ku el a divorsiá for di Osvaldo Cisneros na 2001 despues di tabata kasá kuné for di 1968. Huntu e pareha a krea un imperio di media na Venezuela pero tambe pusha Pepsi Cola komo e marka rekonosé di Cola na Venezuela.

Despues di 2001, Osvaldo a bolbe drenta matrimonio ku Mireya Blavia i na 2021, 20 aña despues el a bin fayesé. Mireya i su yunan i tambe dos yu adoptivo ta buskando nan herensha rònt mundu unda tin mas ku 40 abogado envolví. Na Kòrsou, e grupo di Mireya ku ta konsistí di 6 persona mas a tuma servisio abogado rekonosé, Rogier van den Heuvel. E grupo di Maria Ella tin dos persona mas i nan tin komo abogado, Sebastian Barten di bufete Spigt Advocaten.