Rif– Djáweps awor, 17 di ougùstùs, Kòrsou ta konmemorá  e echo ku 228 aña pasá, na 1795, a tuma lugá na Kòrsou e gran lucha pa libertat bou di liderato di Tula i su kompañeronan.

Ta e fecha ku Gobièrnu di Kòrsou a proklamá na 1984 ofisialmente komo “Dia di Lucha pa Libertat”. E aña akí atrobe Asosiashon Promoshon Konsenshi Istóriko ku koperashon di Gobièrnu di Kòrsou, ta organisá un grandioso konmemorashon na Parke Lucha pa Libertat na Ref riba: Djáweps 17 di ougùstùs di  6.30 pa 9.00 di anochi.E konmemorashon e aña akí lo tin komo lema sentral: “Tula, un baranka di ehèmpel,ku ta inspirá nos awe, pa nos ta mas emansipá mañan”
Ku e lema akí nos ke duna homenahe na Tula komo e gran inspiradó i ehèmpel pa nos lucha pa logra mas i mas emansipashon.  Lo  tin diskurso na enkargo di Minister di Enseñansa, Siensia, Kultura i Deporte, sr. Sithree. van Heydoorn, i señora Jesmelys Zink.

Tur esaki ta keda kombiná ku un programa kultural variá ku músika, deklamashon  baile i teater. Bini unu bini tur pa nos haña infomashon i tambe gosa di un programa kultural variá i asina duna homenahe na Tula i su luchadónan di 1795. Inspirá pa e lucha di Tula nos ta bolbe konmemorá viktoriosamente i ku firmesa:  “Dia di Lucha pa Libertat”