Na e HAP nobo lo tin speshalistanan i dòkternan trahando ku lo atendé kasonan di pashènt. Pashèntnan lo por yama e number di e HAP i asina e dòkternan lo evaluá si e kaso ta unu di urgensia òf no.

Willemstad,– Na luna di mart último, Ministerio di Salubridat Públiko, a pasa un desishon den Hunta di Minister pa instalá un pòst di warda pa médikonan di kas. E desishon aki tin e meta pa aliviá e preshon i trabounan di e departamentu di emergensia.

Presidente di Curacaose Huisartsenvereniging (CHV), dòkter Jerry Semper, a indiká ku entrante 1 di yanüari 2023, CMC lo haña un departamentu apart kaminda dòkternan di kas lo traha warda. E meta di e departamentu aki ta evitá personanan di yega na poli pòrnada.

Dòkter Jerry Semper ta menshoná ku eksperiensha ta mustra ku 9 di 10 hende ku bèl dòkter òf bai poli anochi den mardugá no ta kasonan di urgensia. Jerry Semper a splika ku dòkternan ta komprondé ku ora e pashènt yama no ta tur biaha e pashènt por diferenshá den kasonan di urgensia di bida òf morto. Segun Jerry Semper mester diferenshá e perspektiva di urgensia den dos. E promé ta e perspektiva di e pashènt i lokual e pashènt ta haña urgente. Por ehèmpel, un beibi su nanishi ta kore por ta urgente pa e mayor ku ta yama. E otro perspektiva ta lokual e dòkter ta haña ta urgente, por ehèmpel, si e dòkter ta haña ku si e beibi su nanishi ta kore ta urgente òf no.

Dòkter Semper a sigui splika ku pashèntnan ta bèl dòkter mardugá i wikènt pa tur kos kual ta pone ku e wardanan di dòkter ta bira pisá i alabes na poli e 9 di e 10 personanan ku ta kana drenta, no ta kasonan urgente. Pues ku e Huisartsenpraktijk(HAP) nobo aki na CMC, e pashènt por yega na e bali òf yama pa asina speshalistanan evaluá kiko e kaso di e pashènt ta i si ta unu di urgensia òf no.  Si e kaso ta algu urgente di bida òf morto ta dirigí e pashènt na e porta di EHBO na kual ta trata e pashènt.

Jerry Semper ta agregá ku si e kaso di e pashènt ta algu di urgensia ku e dòkter di kas mes por yuda kun’é, e dòkter di kas lo trata e pashènt lugá di e spesialista na poli. Dòkter Semper a duna un ehèmpel kaminda un persona a kòrta su dede, ta dirigí e pashènt na e dòkter di kas mes. Un kaso asina ta un kasopa dòkter di kas i no ta un kaso pa EHBO, paso e dòkter di kas mes por sera e herida. Den kaso di un dede kòrtá, e dòkter di kas mes por kose i sera e herida.

Na mart, Ministerio di Salubridat Públiko, a pasa un desishon pa instalá un pòst di warda pa médikonan di kas. Segun e karta firmá entre presidente di e asosashon médikonan di kas, Jerry Semper i minister interino na GMN, Javier Silvania, e pòst lo keda ubiká na CMC. Partidonan a kumbiní ku entrante 1 di yanüari 2024, Kòrsou lo tin un HAP na CMC.

Kordinashon lo kontinuá entre minister interino na GMN, Javier Silvania, i asosiashon médikonan di kas (CHV), den kual e asosiashon di médikonan di kas, ta konsehá ministernan riba e proyekto di HAP. Tin tur indikashon, ku e ‘HAP” lo ta operashonal entrante yanüari próksimo na CMC. Jerry Semper a menshoná ku GMN i gobièrnu ta bezig aktualmente ku un proseso den kual lo bai saka vakatura pa asina wak kua dòkter òf zùster lo ke traha na e HAP. Jerry Semper ta menshoná ku tin dòkternan sufisiente ku sea tin un praktiká chikitu òf no tin trabou, ku ta deseá i lo por traha na e HAP.