Deskontinuá: e skedjul presentá den e senario si opta pa deskontinuá e bolsa di penshun na Ennia.

SKALO—Direktor Presidente di Banko Sentral, CBCS, Richard Doornbosch ayera a bolbe enfatisá e importansha pa atendé e problema di Ennia ku koutela. Den e boletin ekonómiko pa Yüni 2023, el a bisa ku e búskeda di un solushon pa e kompania di seguro ENNIA, por afektá kresementu riba término mediano na Kòrsou.

Den pasado e presidente direktor a informá Hunta di Minister kaba riba su posishon. E posishon di Doornbosch a keda ampliamente diskutí tambe den e promé reunion den Hunta di Minister riba e Resolushon di Ennia.  Doornbosch, no ta mira kontinuashon di e bolsa pa aseguradonan na Ennia komo un opshon. Esei ta lokual a keda presentá durante kombersashon den seno di Hunta di Minister na inisio di Yüni. Segun informashon ku a yega Hunta di Minister, Doornbosch ta mira un deskontinuidat komo un opshon mas probabel.

Manera ta konosí, Hunta di Minister a trata e Resolushon Ennia Leven. Ta trata di dos alternativa pa solushoná  e problema na Ennia, despues ku korte a ordená Hushang Ansary i eks direktornan pa repago di un sakeo bionario na 1.1 miar florin.  Na Sèptèmber próksimo, un Tribunal di tres wes den Apelashon lo duna un di dos veredikto den e kaso prinsipal, miéntras den kortenan inferior i sivil tantu na Kòrsou komo internashonal tin mas ku 10 kaso mas andando. Deskontinuá ta nifiká pa presentá e bolsa di penshun na Ennia Caribe Leven riba merkado di benta. Konsekuentemente, kumpradónan interesá pa e bolsa por negoshá pa un deskuento di e bolsa kual na su turno ta nifiká ménos penshun i pago mensual na e penshonadonan.  Téknikamente, esei por ta e mihó solushon a korto plaso, sin mester laga e kompania kore riesgo riba su liña di solbabilidat peligrando demas bolsa di seguro manera “Schade” i “Ziekte”.

E Resolushon pa Ennia ku ta riba mesa, no a tene na konsiderashon verediktonan pendiente den korte. Ekspertonan kende a traha e proposishon no a duna splikashon pa e omishon. Segun e komishon na momento opta pa deskontinuá e bolsa di penshun na Ennia, por kalkulá un pèrdida kolektivo di 20% riba e penshunnan. Aparte di risibi un pèrdida den balor di e penshunnan, e aktivonan na Ennia tambe lo hiba pèrdida den balor. Segun ekspertonan, si gobièrnu opta pa finansiá e pèrdida den balor di e penshunnan na Ennia, komunidat di Kòrsou tin di paga 1.3 miar durante un periodo di 25 aña. Esaki ta ekivalente na un promedio 51 mion florin anual. Ademas mester bini un fondo di kontribushon anual di kasi 20 mion florin. Ekspertonan a deskonsehá e ruta di deskontinuidat, kontrali na e opinion di Doornbosch.

Pero e eksperto monetario na Banko Sentral, presidente direktor Richard Doornbosch a laga sa su reakshon riba e alternativa di deskontinuidat. Aparte di Doornbosch, den seno di Hunta di Minister tin mas desunion riba e proposishon ku a duna dos alternativa. Esta deskontinuá òf kontinuá. Entre otro Minister di Asuntunan Ekonómiko, Ruisandro Cijntje a preferá pa Kòrsou tuma su tempu promé tuma desishonnan deskabeyá. Tantu den e alternativa di deskontinuá komo esun pa kontinuá, e komishon a proponé un asina yama Special Purpose Vehicle. Ta trata di un institushon manera ta e kaso na Giro, GSH. Den kaso na Ennia, e vehíkulo speshal ta keda enkargá ku maneho temporal  miéntras ta buska un kumpradó pa e parti di penshun.

Hecho ku ta ku e efekto kolektivo riba un solushon di Ennia, lo tin efektonan severo makro ekonómiko. Kòrsou mester subi merkado di kapital pa fia por lo ménos 700 mion florin. Esaki lo bira pagamentu di e debe nashonal, sin tabatin un invershon den su kontra pa krea un kontra efekto. Kòrsou tei paga pa un pèrdida ku e no tin nada di haber. E resolushon ta proponé pa paga pa un debe ku no tabata falta di Kòrsou.