Richard Doornbosch, presidente direktor Banko Sentral.

Skalo—E Produkto Nashonal Brutu na balor nominal, di Kòrsou na 2023 a desaroya i yega na 5.9 miar florin. Esaki ta lokual ekspertonan bankario na CBCS, Banko Sentral a konfirmá durante un rueda di prensa na Skalo. Esaki ta un sifra hopi haltu, lokual ta un bon desaroyo pa e kota di debe nashonal, kual entretantu a baha tambe yega na 69%.

E sifranan ta reflehá un bahada di por lo ménos 20 punto di porshento kompará ku 90% durante periodo di Covid. Banko Sentral ta spera tambe durante 2024 un mehorashon den esaki. Ta spera e kota di debe bira 66% na 2024 i na 2027 esaki ta baha pa yega na 63.4%.  Segun Banko Sentral ayera, Kòrsou su debe nashonal a sigui na 4.1 mira florin. Mayoria ta debe na Hulanda. Sin e último sosten di likides ku a bira fiansa, Hulanda tabata papiando ku Kòrsou debe 1.1 miar euro, kual ta ekivalente na 2.4 miar florin. Aserka tin di bini segun Banko Sentral kasi 480 mion florin na fiansa doméstiko miéntras ministerio di finansas a garantisá un adishonal 911 mion na sosten di Covid. Aparte di esei mester kalkulá aserka un fiansa di 170 mion florin pa rekuperashon kuentanan na Giro via di GSH. En total Kòrsou debe 3.9 miar florin na fiansa i aserka mester kalkulá debe na kréditornan no monetario. Ta pronostiká e debe di Kòrsou entre 4.1 pa 4.53miar florin. Segun Hulanda e kota di debe di Kòrsou tabata 88% na final di 2022.  E kota di debe ta reflehá e relashon entre e debe nashonal i produkto nashonal brutu. Mester separá e definishon nominal, lokual ta un aspekto tékniko determinante den e kálkulonan.

Anke un debe di riba 4.1 miar ta mustra haltu, na 2019 e debe total di e unidat di Kòrsou tabata 2.9 miar florin. Ku un Produkto Nashonal Brutu di 5.5 miar e kota di debe relashoná na e Produkto Nashonal Brutu tabata 52%. Sifranan a konfirmá, un deterioro serio unda kálkulonan indikativo a mustra ku e kota di debe a yega 90% dje Produkto Nashonal Brutu Nominal. Hulanda ta kalkulando 88% te ku desèmber 2022 i djarason último Doornbosch a konfirmá e kota di debe nashonal na 69%.

Den pasado, Banko Sentral a rekomendá pa Kòrsou refinansiá su bolsa di debe na un interes hopi abou. Si Kòrsou no logra refinansiá e repago ta bira un peso serio riba likides di gobièrnu i difikultá finansiamentu di prosesonan primario den e pais.  Komo un di dos opshon, Banko Sentral a rekomendá pa negoshá parti dje bolsa di debe den forma di “opsekio” ku e gobièrnu di Hulanda. Den otro palabra, laga Hulanda “regalá” Kòrsou. Esei awor no ta un tópiko di diskushon mas.