Ora a logra saka un di e botonan for di den laman.
Willemstad— Outoridatnan ta investigando un kaso di insendio unda dos boto di piskadó ku tabata mara na pir a bai pèrdí den kandela.
Tabata djarason mardugá ku pagadónan di kandela stashoná na Mundu Nobo a keda dirigí ku urgensia pa e pir di piskadó na Piscadera pa un boto ku tabata na kandela. For di un dia anterior outoridatnan a haña e informashon ku a tuma nota di dos tipo sospechoso den e aria di e botonan ku kara tapa. Ora a bai hasi investigashon na e sitio no a bin topa ku nada partikular. E dia siguiente si esta djarason último den oranan di mardugá deskonosínan a presentá na e sitio unda a sende un boto di piskadó na kandela. A basha líkido flamabel rònt den e boto pa despues a sende esaki na kandela. E kandela rápidamente a poderá di e boto pero tambe a pasa i kima un otro boto ku tabata den serkania. E kandela a destruí tur e dos botonan pone ku esakinan a bai fondo di laman. E promé boto ku a ser sende na kandela ta kasi nada no a sobra di dje miéntras e otro si a sobra algu i mas lat riba e dia ei mes a saka e parti di e boto for di den laman. Polis a forma un tim i ta investigando pa saka afó ken ta responsabel pa sende e botonan na kandela i kiko por ta e motibu. Pa e aña aki tin vários boto ku a ser sende na kandela. E kaso ta den investigashon.