Buena Vista– Djárason 13 di sèptèmber 2023, alrededor di 06.00’or, personal di Divishon di Krímen Organisá a tene un entrada hudisial na e adrèsnan den Orchillaweg i Welatinaweg.

Esaki tabata den kuadro di un investigashon penal ku ta andando en konekshon ku un kaso di violashon di lei di arma di kandela, droga i ladronisia. Durante di e entrada hudisial aki a haña i konfiská telefòn selular i algun munishon. Na e sítio polis a detené e hòmbernan sospechoso R.U.A.G. i R.R.P. tur dos di 30 aña di edat, ámbos nasé na Kòrsou, i e dama sospechoso J.C.B.D. di 40 aña di edat, nasé na Venezuela, enkonekshon ku violashon di lei di arma di kandela.

 A presentá e sospechosonan dilanti un fiskal ouksiliar ku despues di interogashon a entregá e dama na Departamento di Imigrashon ku lo sòru pa su deportashon. A ordená enkarselamentu pa e R.U.A.G i R.R.P. pendiente di mas investigashon.