Firma: presidente di parlamento di Kòrsou, Charetti America Fransisca a firma lista di palabrashon durante último IPKO. IPKO te ainda no tin logro pa Kòrsou.

Punda—E problema di tráfiko aéreo pa sostené turismo entre Venezuela i Kòrsou, por lo pronto no tin horizonte pa solushon. Ta trata di un merkado di entre 65 pa 90 mion dòler di negoshi ku ta yuda krea empleo na Kòrsou, den sektor hotelero, tráfiko aéreo, horeka  i atrakshonnan turístiko. E problema a bira ku Embahada Hulandes na Venezuela no ta duna mas ku 200 visa pa luna. Esei ta pa islanan ABC.

Pa kasualidat gobièrnu a kai na Hulanda, kousando mas problema pa yega na un desishon a korto plaso. IPKO, ku no ta logrando nada den Reino pa Kòrsou, kisas den nan show na Febrüari siguiente por pone e problema riba nan agènda. E siguiente IPKO lo ta na Febrüari 2024. Durante e último IPKO e delegashonnan a reuní riba entre otro sklabitut, enseñansa, klima i protekshon di privasidat. IPKO no a toka e problemanan di restrikshon na frontera di Kòrsou ni tampoko no a atendé a problemátika di habri frontera ku Venezuela. Pa hopi aña tin reklamo riba efektividat di IPKO. Manera na ta tuma lugá na final di tur IPKO, e Parlamentonan ta ratifiká e lista di palabrashonnan hasí. A disidí un biaha mas tambe ku kada delegashon mes mester sòru pa tradukshon si ta nesesario, sin ku esaki ta stroba un interkambio bibu di pensamentu. A palabrá tambe ku e presidensia ta konsistí di e presidentenan dje Parlamentonan (ku eksepshon di Hulanda), esnan dje komishonnan i e grefirnan. Riba e palabrashonnan i agènda, no a toka e tema si Hulanda ta bai restringí komersio entre Kòrsou i Venezuela. Parlamentarionan di Kòrsou, inkonsientemente a partisipá na un plataforma ku Hulanda a krea sin benefisio pa Kòrsou (por ehèmpel ainda no tin Areglo di Disputa).

Un di dos problema ku e falta di visa por kousa ta stagnashon ekonómiko entre e paisnan. Por ehèmpel, biahe di komersiantenan entre Kòrsou i Venezuela ta difikultá.  Manera ta konosí, Global Oil a kaba di firma un kontrakt mionario ku Refineria di Kòrsou. E kontrakt ta enserá upgrading ku ta rekerí ekspertonan di Venezuela pa bula bini Kòrsou. Na e momentonan aki mes, tin un agensia di biaha na Venezuela ku un kliente ku mester bula pa bin pa upgrade e planta di asfalt. E no por a biaha pa motibu di visa.