Atleta hubenil femenino di aña, kende alabes a gana premio Beto Adriana komo deportista di aña, Dena-Marie Barby, risibiendo su premio.

WILLEMSTAD— FDOK a tene nan tradishonal anochi di premiashon ayera na WTC. Ta trata aki di e evento “FDOK Honors Night”, ‘Balorá Yu di tera’, unda a premia deportista, dirigente i ekiponan ku mas a destaká den deporte riba nos isla, durante di e aña ku ta tras di lomba.

Ademas a pone atenshon na un grupo di 10 veterano deportista, kende a konta ku un karera eksitoso, durante di nan añanan ku nan tabata den kompetensia den deporte.

Mientras ku komo e chèri riba e bolo, tabatin e premiashon YDK, ku a bai pa un embahador yu di tera, kende a destaká riba plano internashonal, mientras ku Premio Enith Brigitha a bai pa un deportista ku ta biba na Kòrsou i a kompetí pa Kòrsou, sakando kara di nos isla.

Tambe a probechá pa instalá 10 baluarte di nos deporte, den Salon di Fama.

E 10 baluartenan ku a keda instalá den Salon di Fama, ta:
Leonise Avastia (Sòftbòl)
Frank Curiel (Beisbòl)
Hensley Rondei (Dam)
Kenneth Gijsbertha (Beisbòl i sòftbòl)
Norman ‘Nooi’ Girigorie (Futbòl)
Benigno Imperator (Beisbòl i sòftbòl)
Ramiro Hart (Vòlibòl)
Xiomara de Lanooy (Sòftbòl)
Ruthsel Martina (Atletismo)
Joseph Martina (Beisbòl i sòftbòl)

E ganadónan den e diferente kategorianan di premiashon:
Premio Beto Adriana (Deportista di anja):   Dena-Marie Barby
Femenino senior:         Aisha Hoevertsz (Arkeria)
Femenino hubenil:       Dena-Marie Barby (Atletismo)
Maskulino senior:         Fabian Williams (Bòkseo)
Maskulino hubenil:       Giovanni Abath Jr. (Atletismo)
Prospekto hubenil:       Jermain Brigitta Perez (Karate)
Hues:                            Marie-Antoinette Keli (Pinpòn)
Ekipo:                            The Eagle (Atletismo)
Dirigente tékniko:         Carlos Pineda (Beisbòl)
Dir. atministrativo:        Jedrek Magdalena (Beisbòl)
Selekshon:                   Beisbòl
Premio YDK:                 Churandy Martina
Premio Enith Brigitha:  Glenka Antonia