WILLEMSTAD——  20 yanüari 2024 – CURA DOET ta lansa e  “Youth Ambassadors” kampaña pa inspirá hóbennan pa hasi trabou boluntario !

Riba 15 i 16 di mart 2024 henter Kòrsou lo uni forsa i lo ta riba pia pa un bon kousa. Den 2014, CURA DOET a ranka sali pa promé biaha i mesora tabata un éksito rotundo.

Tur aña di nobo organisashonnan sosial (entre otro sentronan di bario, skolnan, kas nan di kuido, klupnan deportivo, krèsh ets.) ta inskribí un tarea i risibí sosten di un gran kantidat di boluntario. Pa CURA DOET su di 11 edishon, Curaçao Cares, e motor tras di akshon, ke konsientisá nos hóbennan di e importansia di trabou boluntario pa medio di nan inisiativa nobo, CURA DOET “Youth Ambassadors”.

E aña aki e énfasis di CURA DOET lo ta riba nos hóbennan pa asina para ketu riba e importansia di trabou boluntario for di chikí. Pa e motibu aki Curaçao Cares a djòin e organisashon Happy Villa Enrichment Center pa huntu krea e kampaña pa nos hóbennan kual ta; “CURA DOET Youth Ambassadors”. E kampaña ta wòrdu organisá huntu ku algun hóben di Happy Villa Enrichment Center ku pa algun tempu kaba ta partisipá na hasi trabou boluntario. Kompartiendo nan eksperensianan personal pa ku trabounan boluntario e “CURA DOET Youth Ambassadors” nan ke konsientisá otro hóbennan riba e balor di trabou boluntario i prinsipalmente e satisfakshon ku e trabou aki ta trese kuné.

Youth Ambassadors ta invitá otro hóbennan pa partisipá den e movementu aki i huntu hasi un diferensia. E kampaña ta kuminsá riba 20 di yanüari 2024 y por sigui é riba e kanalnan di social media di CURA DOET.