BUENOS AIRES – Pa medio di un komunikado ofisial emití ayera e federashon di futbòl di Argentina AFA a anunsiá ku e legendario entrenadó César Luis Menotti a fayesé na edat di 85 aña.

E  históriko entrenadó kampeon di mundu ku e selekshon Argentina na 1978, “El Flaco” manera popularmente nan tabata yam’é, tabata funshoná komo direktor di Selekshonnan i pa algun tempu kaba a bin ta sufri di problemanan ku salú ku na vários okashon a eksigí su hospitalisashon .

E mester a keda interná pa vários dia i asta a impidié di biaha pa e Mundial di Qatar, kaminda na desèmber di 2022 Argentina a gana su di tres título mundial. Último aki e tabata interná den kuido intensivo pa un kaso serio di anemia i dia 10 di aprel último e por a bandoná hospital i a bai kas.

“Ku enorme tristesa Federashon di futbòl di Argentina ta lamentá di informá fayesimentu di César Luis Menotti, aktual Direktor di Selekshonnan Nashonal i eks tékniko Kampion di Mundu di Argentina”, asina AFA a publiká riba su kuenta ofisial.

Claudio Chiqui Tapia, presidente di AFA, tambe a ekspresá su mes riba su kuenta di X: “Kerido Flaco, ta un doló inmenso di tin ku despedí bo. Bo a laga hopi rekuerdo pa nos ku bo trayektoria na kabes di e selekshon di Argentina i pa futbòl den su totalidat. Sin duda, bo paso pa inmortalidat lo ta ku e mihó rekuerdonan di nos tur ku ta stima futbòl”.