Èks kasá i e pareha nobo ta keda man bashí despues di e keda menasá riba diferente momentu.

Nieuwe Haven,– E víktimanan di maltrato i menasa a splika hues ku nan ta pidi un daño perwisio na balor di 30 mil florin.

Segun splikashon di e pareha nobo dje èks kasá di J.R, el a keda maltratá i a keda menasá riba diferente okashon. Esaki a nifiká ku e mester a kambia su bida riba un manera basta drástiko. Na momentu ku akusado J.R a presentá na nan kas i hiba diferente menasa, e èks kasá ku inisial B.S i e pareha nobo ku inisial J.G a opta pa muda i bai biba den un kas di hür. Komo ku e kas di hür aki tabata mas chikí, nan mester a deshasí di diferente meubel, pues tur esakinan tabata tin gastu mará na dje.

Alabes mirando ku e menasanan a sigui tuma lugá, e èks kasá huntu ku e pareha nobo a opta pa muda pa Hulanda numa. E mudansa di Hulanda tabata karu mirando ku nan mester a kumpra ticket nobo i kambia di trabou. Na momentu ku suma tur e gastunan aki, e gastunan ta riba 30 mil florin segun e splikashon di víktima J.G, kende a wòrdu maltratá riba 5 di mart 2023 dor di e akusado.

Hues a indiká ku e no por honra e daño perwisio komo ku e “daño” no tin un relashon dirèkt ku e menasa i maltrato, pues hues Carmelia a splika ku e kaso aki por sigui via e ruta sivil.