Willemstad, —  Djamars 26 di desèmber 2023 alrededor di 22.50’or, Sentral di Polis a dirigi algun unidat di Bike Team pa Casino di un hotèl den área di Rif, pa un hòmber ku tabata bringando ku e personal di seguridat di e Casino.

 Na yegada di e unidatnan, nan a bin topa un hòmber ku tin prohibishon pa drenta e casino, pará na porta i tabata diskutí ku e bewaker. En bista ku e hòmber aki tabatin prohibishon pa drenta e casino, el a wòrdu kitá for di e sitio. Algun ratu despues e hòmber aki a bolbe na e sitio i a kuminsá menasá e bewaker. Ora polis a yega el a kuminsá insultá outoridat i por a nota tambe ku e lo a konsumí basta alkohòl. Relashoná ku insulto di empleado públiko den su funshon, menasa i burachería públiko, a detené e hòmber A.G.A. di 45 aña di edat nasé na Kòrsou, pendiente di mas investigashon.