AMSTERDAM—Tres skol hudiu na Amsterdam ta keda será awe komo medida di prekoushon pa posibel insidentenan.

E medida ta resultado di un yamada di Hamas na komunidat islamiko pa protesta djabièrne i komo sosten. Ta trata di skol básiko Rosj Pina, skol sekundario Maimonides i Cheider (basiko/sekundario). Mayornan di e alumnonan a keda informá via un karta. E skolnan a disidí di sera nan portanan pasobra no tin vigilansia kontinuo. Solamente ora habri ku sera skol tin vigilansia.

E direktiva no kier tuma ningun risiko segun Parool. No ta kla si ta trata di un medida di prekoushon òf un menasa konkreto. Den e karta na e mayornan ta papia di mensahenan preokupante riba media sosial resientemente. E skolnan ta rekonose ku e siere por tin influensia riba e sentido general di seguridat. Pero segun outoridatnan e nivel di menasa a keda igual. E alumnonan lo haña les online awe. No ta kla si e skolnan ta habri otro siman. For dia Hamas a hasi yamada tin un sentido di miedu apsoluto den e komunidat hudiu, segun sentro di informashon i dokumentashon Israel (CIDI). Di pasado nos sa ku kada bes ku tin konflikto na Gaza esaki tin influensia riba e komunidat hudiu na Hulanda segun CIDI. Ya tin melding di diferente insidente na CIDI. E komunidat hudiu a manifesta djaweps 17.00 riba Dam. Hamas kier pa komunidat moslim manifesta awe pa sostene e palestinonan. Premier Rutte a bisa e siman aki ku gobièrnu ta ekstra alerta pa e seguridat di e komunidat hudiu, prinsipalmente na sinagoganan i skolnan.