Silvania ke warda pa inkluí miónes di Ennia den presupuesto

Pietermaai – Komishon Finansa di Parlamento a risibí e petishon Minister di Finansa Javier Silvania di frakshon MFK pa entregá e proposishon di Presupuesto 2024, mas lat ku Areglo di Estado ta pèrmití.

Presidente di Parlamento Charetti America-Francisca a manda esaki dirèkt pa e komishon, teniendo kuenta ku e karakter di urgensia ku e petishon di Silvania tin.

Manera Vigilante a informá, e motibu prinsipal pa e petishon di Minister Silvania ta warda resultadonan dje negosiashonnan andando ku Hulanda tokante e diferente fiansanan ku Kòrsou tin i ku mester refinansiá ainda. Presidente America-Francisca: “Konforme artíkulo 63 insiso 2 di e Reglamento di Orden di Parlamento, e Presidente di Parlamento tin e outoridat pa e mes manda un tema pa un komishon, si e ta di opinion ku no por sinta warda un desishon den un reunion públiko. Den kuadro di esaki mi ta konsiderá e petishon asina urgente i relevante pa interes general di pueblo i a manda e karta pa Komishon di Finansa. Tambe mi ta pidi bo komo Presidente di Komishon pa riba un término hopi kòrtiku entregá un proposishon na Komishon Sentral.”

Silvania a hasi e petishon pasó e ta preferá warda resultadonan di e negosiashonnan andando ku Hulanda pa ku refinansiamentu dje fiansa di likides di 910 mion florin i tambe pa ku posibel solushon pa e kompania di seguro Ennia, ku tambe lo ta posibel ku fiansa di Hulanda. E Minister no ke entregá e Presupuesto balansá ku tin riba mesa awor akí, pasó e ta kontené solamente informashonnan te ku luna pasá i no resultado dje negosiashonnan menshoná ku tambe e lo ke inkluí den e Presupuesto.

Konforme artíkulo 85 insiso 3 di Areglo di Estado, mester entregá e proposishon di Prespuesto riba e di dos djamars di sèptèmber pa Parlamento trata. “Un proposishon di un Presupuesto 2024 balansá ya ta entregá na Kolegio di supervishon finansiero (Cft) i na Hunta di Konseho (RvA) pa konseho. Pero e proposishon ta trahá a base di informashonnan konosí te ku luna yüli dje aña akí. Aktualmente tin negosiashon andando ku Hulanda tokante refinansiamentu dje fiansanan di likides (na balor di 911 mion florin), finansiamentu di invershonnan duradero i solushon pa e problema ku ENNIA (posiblemente pa medio di un fiansa di Hulanda). E negosiashonnan akí ta den e fase final.” Segun Silvania, posiblemente lo yega na un akuerdo gubernamental ku Hulanda na fin di sèptèmber próksimo tokante refinansiamentu dje fiansanan di likides i solushon pa e problemanan finansiero di Ennia.