Mensahenan di estafa ku ta plamando ayá na Hulanda. E mensahenan aki a sigui bai otro airopuerto tambe.

Willemstad,– E airopuerto Hulandes Schiphol a emití un komunikado riba 24 di òktober 2023 indikando ku estafdónan riba plataformanan sosial ta tratando na estafá hende dor di bende supuesto maletanan ku a pèrdè durante biahenan internashonal.

E komunikado ku a keda públiká den oranan di mèrdiá e siman aki a splika ku “ aktualmente riba Facebook i Instragram tin vários akount aktivo ku ta karga a e nòmber di “Schiphol” òf tin un nòmber kasi meskos ku e airopuerto. E akountnan aki ta tratando na haña kliente ku interes pa kumpra maletanan ku a keda atras na e airopuerto, pero e Schiphol a enfatisá ku e akountnan aki ta falsu”.

E komunikado a agregá ku e airopuerto nunka sa bende maletanan ku a keda atras, pues e airopuerto no ta tras di e aktividatnan di benta tampoko. Pesei Schiphol a rekomendá den nan komunikado ku pa porfabor no trata na kumpra nada via di e akount nan aki.

Segun informashon, e tipo di estafanan aki ta pasando na diferente airopuerto internashonal. Ta asina ku e aeropuerto prinsipal na Dublin tambe tin mesun problema. E mensahenan riba ret sosialnan manera Facebook ta indiká entre otro ku depósito di maleta ta yenando i pa traha mas lugá e airpuerto a kuminsá ku benta di maleta. E mensahe ta sigui splika ku, e maletanan por inkluí diferente produkto manera paña i sapatu, pero tambe sa tin produktonan nobo nobo manera telefòn warda. Por útimo e mensahenan ta splika ku benta dje maleta ta kuminsá na tres dòler dependé e tamaño dje maleta.

Tambe sa tin mensahenan ta indiká ku formalmente tipo di maletanan pèrdi mester wòrdu distruí, pero e airopuerto a opta pa bende e maletanan i e fondonan rekoudá ta bai na fundashon di un bon kousa.

Tipo di mensahenan asinaki, no a yega na airopuerto Hato ainda, pero ta importante pa ta na altura di e diferente estafanan ku ta tuma lugá diariamente.