AMSTERDAM—Mas di 800 ret kriminal ta forma un menasa grandi pa Union Oropeo segun un rapòrt nobo di Europol.

Ta promé biaha ku e retnan kriminal aki na nivel Oropeo ta riba mapa i analisá a base di informashon di tur pais miembro. E 821 retnan kriminal ta konsisti di mas di 25.000 hende di 112 nashonalidat. Mayoria ret ta aktivo den trafikashon di droga. No ta un sorpresa ku Hulanda komo produktor importante i pais di transito di droga, ta menshoná varios biaha den e rapòrt di Europol. Hulandesnan hopi biaha ta envolví den trafikashon di kokaina. Prinsipalmente infiltrashon den komersio legal Europol ta mira komo un peliger di e retnan kriminal Oropeo. Pa e aktividatnan illegal e kriminalnan ta usa 86% strukturanan ilegal. Ku infiltrashon den komersio kriminalnan por skonde nan aktividatnan i laba plaka. Mayoria (68%) di retnan ta konsisti di miembronan di varios nashonalidat. Hulandesnan ta den diferente grupo kriminal manera retnan ku polakonan, serbionan, albanesnan, turkonan i marokanonan. Segun Europol tin diferente motibu dikon kriminalnan ta kopera huntu den un ret. Tin biaha kriminalnan ta opera den mesun regio, den otro kasonan tin retnan ku kriminalidatnan di mesun nashonalidat. Un di e retnan kriminal regional ta esun belga-hulandes segun Europol. Nan ta aktivo prinsipalmente den trafikashon di kokaina i tambe den mariwana i labamentu di plaka.